15-avgust kuni Navoiy viloyati IIB xodimlari oʻtkazgan tezkor tadbirda jinoiy guruh tomonidan Samarqand viloyatidagi xalqaro aeroport orqali Turkiyaga yuborilib, odam savdosidan jabrlanishi mumkin boʻlgan ayollar toʻxtatib qolindi. Bu haqda IIV jamoatchilik va OAV bilan aloqalar boshqarmasi xabar berdi.
Samarqandlik R.B. Navoiy viloyatidan 3 nafar chet davlatida ishlash istagida boʻlgan, moddiy muhtoj, ishsiz va turmushidan ajrashgan ayollarni topib, ularni uy ishlari yoki savdo doʻkonlarida sotuvchi boʻlib ishlash haqidagi aldovlar bilan Turkiyaga joʻnatishni rejalashtiradi.
Unga bu ishni hozirda Turkiyada yashayotgan onasi R.M. buyurgan va yuborilayotgan ayollarni Istanbulda oʻzi kutib olishini maʼlum qilgan. R.N. ayollarni joʻnatish arafasida ularga Turkiyaga borgandan soʻng badal puli sifatida 6000 dollar ishlab berishlarini shart qilib qoʻyadi va ayollarga fohishalikka ketayotganliklarini bildiradi.
Bundan xabar topgan ayollar Turkiyaga ketish fikridan qaytishlariga qaramay, R.N. ularni “Sizlarning har biringiz uchun alohida chipta rasmiylashtirilgan, agar fikringizdan qaytsangiz, sarflangan xarajatlarni qoplashingizga toʻgʻri keladi” deb, fikrlarini oʻzgartiradi.
Oʻtkazilgan tezkor tadbirda R.N. qoʻlga olindi. Hozirda Navoiy viloyati IIB huzuridagi tergov boshqarmasi tomonidan tergovoldi harakatlari olib borilmoqda.
Izoh (0)