Ўзбекистон ёшлар иттифоқи Марказий кенгашида «Ёшлар – келажагимиз» жамғармаси ва Халқ банки, «Ипак йўли» банки, Миллий банк ҳамда «Hamkorbank» ўртасида бош келишув имзоланди. Шундан сўнг жамғарма фаолияти юзасидан матбуот анжумани бўлиб ўтди.
Унда Бош прокуратура, Бандлик ва меҳнат муносабатлари вазирлиги, ОАВ вакиллари, тадбиркорлар ва ёшлар қатнашди.
Тадбирда жамғарма ижро этувчи директори Бунёдбек Баҳромбеков ёшларнинг бизнес ташаббуслари, стартап, ғоя ва лойиҳаларини қўллаб-қувватлаш, ишсиз ёшларни мутахассислик ва бизнес юритиш кўникмалари бўйича ўқитишга доир амалга оширилган чора-тадбир ва ислоҳотлар юзасидан батафсил маълумот бериб, штаб фаолиятини сарҳисоб қилди.
Унга кўра, барча туман ва шаҳарлар маҳаллалари кесимида 4861 та кичик гуруҳ тузилган. Уйма-уй юрилиб, ёшлар билан сўровлар ўтказиш, уларнинг муаммо ва қизиқишларини ўрганиш, ҳудудга «ташхис» қўйиш ишлари олиб борилди.
Ўрганишлар мобайнида республика бўйича 823 489 нафар ишсиз ёш аниқланди. Уларнинг 574 032 нафари бандлик масаласида мурожаат қилган, 400 867 нафари тадбиркорлик фаолиятини бошлаш учун кредит, 67 459 нафари бизнес лойиҳаларини йўлга қўйиш учун жой масаласида кўмак сўраган. 209 544 нафар ёш касб-ҳунар ўрганиш, бепул курсларда ўқиш истагини билдирди.
Мавжуд муаммоларнинг ижобий ҳал этилишида Тошкент вилояти, Қуйи Чирчиқ тумани ва Тошкент шаҳри, Чилонзор туманидаги тажрибаларга таянилди.
Жумладан, тадбиркорлик соҳасига кириб келаётган 13 261 нафар ёш мазкур соҳа билан яқиндан таништирилиб, бизнес-режалар тузиб берилди. 27 381 нафари иш билан таъминланди. 6893 нафар ёшлар касб-ҳунар ўрганмоқда.
53 975 нафар вояга етмаганлар ва ёшлар турли йўналишдаги тўгаракларга жалб этилди. Шунингдек, 3696 нафар ёшлар тадбиркор сифатида рўйхатдан ўтказилди. Бундан ташқари, 146 нафар ёш фаолият кўрсатиш учун бино билан таъминланиб, 3032 нафари касаначиликка жалб этилди.
Марказий банк бошқарма бошлиғи Комил Аҳмедов «Ёшлар – келажагимиз» жамғармаси маблағларидан имтиёзли кредитлар ажратиш ва лизинг химзатларини кўрсатиш ҳамда тижорат банклари кредитлари бўйича кафилликлар бериш тартибига алоҳида тўхталди.
Мулоқот давомида ишсиз ёшларни касблар ва мутахассисликларга профессионал ўқитиш юзасидан ҳамда қисқа муддатли курслар сонини кўпайтириш ва сифатини ошириш бўйича амалга оширилаётган чора-тадбирлар тўғрисида фикр билдирилди.
Анжуман сўнгида иштирокчилар спикерларга ўз саволлари, таклиф-тавсияларини берди. Учрашувда «Ёшлар – келажагимиз» жамғармаси логотипи учун танлов ҳам эълон қилинди.
Изоҳ (0)