Innovatsion rivojlanish vazirligida elektron tijorat sohasidagi tadbirkorlar bilan uchrashuv bo‘lib o‘tdi. Tadbirkorlarni vazir o‘rinbosari Azimjon Nazarov qabul qildi. Bu haqda “Daryo”ga vazirlik matbuot xizmati xabar berdi.
Uchrashuv davomida Fom Group MCHJ rahbari M. Mahkamov farmatsevtika biznesini avtomatlashtirish va dori vositalarining yagona ma’lumotnomasini yaratish loyihasi taqdimotini o‘tkazdi. Loyiha dorixonani yuritish jarayoni, dorilarni yetkazib berish tizimi, dorilar bo‘yicha ma’lumotnoma xizmati, dorixonalar va ulgurji farmatsevtika korxonalari uchun universal avto-buyurtma tizimini o‘z ichiga oladi.
Bugungi kunga kelib mavjud dastur O‘zbekistondagi 1610 ta dorixonani qamrab olgan, 300 ta dorixona onlayn rejimda faoliyat yuritmoqda, 10 000 nomli tovarlarning tayyor bazasi tuzilgan, turli xil ilovalar 150000 nafar foydalanuvchilarga ega. Tadbirkorning endigi maqsadi bu dasturni yanada mukammallashtirish va uni yanada ko‘proq dorixona hamda farmatsevtika kompaniyalarni qamrab olishini ta’minlashdir.
Prezidentning “Farmatsevtika tarmog‘ini jadal rivojlantirish bo‘yicha qo‘shimcha chora-tadbirlar to‘g‘risida”gi qarorida dori vositalari va tibbiy buyumlarni dorixonalar tomonidan aholiga yetkazib berishni ta’minlagan holda real vaqt rejimida sotib olish imkoniyatlarni taqdim etadigan Internet tarmog‘ida axborot portalini, shuningdek, mobil ilovalarni yaratish vazifasi belgilangan. Bu vazifa esa qisman Fom Group MCHJ tomonidan amalga oshirilgan bo‘lib, endi Sog‘liqni saqlash vazirligi va Axborot texnologiyalari va kommunikatsiyalarini rivojlantirish vazirligi bilan hamkorlik o‘rnatish va bu loyihani yanada rivojlantirish talab etiladi.
Venkom MCHJ bosh direktori A. Ismailov tashkilotlararo elektron hujjatlar almashinuvi bo‘yicha ishlanmasini namoyish etdi. Bu har qanday egalik shakldagi va masshtabdagi korxonalar o‘rtasida yuridik ahamiyatga ega hujjatlarni qog‘ozsiz yurgizishni tashkil etish xizmati bo‘lib, hisob varaqalari va boshqa birlamchi hujjatlar bilan tez va ishonchli almashinuvni ta’minlaydi, shuningdek hujjatlarni imzolashda elektron-raqamli imzodan foydalaniladi. Bu o‘z navbatida hujjatlarni yetkazib berish va imzolashga ketadigan vaqtni qisqartiradi, mablag‘larni tejaydi, imzolarning xavfsizlik darajasini oshiradi, hujjatlarni saqlanishining ishonchliligini ta’minlaydi.
Ismoilov Innovatsiya vazirligidan milliy iqtisodiyotni raqamlashtirish uchun mas’ul bo‘lgan vazirlik va idoralar bilan o‘zaro munosabatlar qurishda ko‘mak berishni so‘radi.
The Boss media group (Qozog‘iston) korxonasi ta’sischilaridan biri M. Barishev qo‘shni mamlakatda muvaffaqiyatli amalga oshirilgan loyiha — “Barchasi hisobchi uchun” portali haqida so‘zlab berdi. Mazkur portalda buxgalteriya hisobi, soliqlar, qonunlar, ijtimoiy yo‘nalishga ega notijorat tashkilotlar, moliyaviy hisobot yuritishning xalqaro va milliy standartlari, shuningdek CAP va CIPA o‘quv materiallari, namunaviy hujjatlar, turli savollar javoblar mavjud.
O‘zbekistonda soliq siyosatini takomillashtirish konsepsiyasi va Soliq kodeksi loyihasining yangi tahriri ishlab chiqilishi munosabati bilan M. Barishev xuddi shunday portalning O‘zbekistonda ishga tushirilishi katta imkoniyatlar eshigini ochib berishini ta’kidladi. Shu o‘rinda korxona mazkur loyihani o‘z mablag‘lari hisobidan amalga oshirishi to‘g‘risida ham axborot berildi.
Shuningdek, Barishev O‘zbekistonda ishlab chiqariladigan ekologik toza mahsulotlardan quriladigan eko-ofis uchun yer maydoni ajratilishiga ruxsat olishga ko‘mak berishni so‘radi. Mazkur eko-ofisda muqobil elektrenergiya manbalaridan hamda maishiy maqsadlarda tozalangan yomg‘ir suvidan foydalanish nazarda tutilgan bo‘lib, bu tabiiy resurslarni tejashga olib keladi.
Bu loyiha tadbirkorlarga katta xarajatlar talab etmaydigan qurilish namunasini namoyish etish maqsadini o‘z oldiga qo‘ygan bo‘lib, shaharga va davlatga katta foyda keltiradi. Bu loyihani ham korxona o‘z mablag‘lari hisobiga amalga oshirishni ko‘zlagan.
Innovatsion rivojlanish vazirligi yuqoridagi loyihalarning barchasini qo‘llab-quvvatlab, ularni hayotga tatbiq qilinishida amaliy yordam berish yo‘lida harakatlarni boshlab yubordi.
Izoh (0)