Farg‘ona viloyatining Bog‘dod tumanida Respublika ishchi guruhi mahallalarda va oilalarda ijtimoiy-ma’naviy muhitni o‘rganib, aniqlangan muammolarni bartaraf etishga ko‘maklashmoqda. Respublika ishchi guruhi tarkibiga Prezident devoni, Bosh prokuratura, Ichki ishlar vazirligi, Xotin-qizlar qo‘mitasi, Din ishlari bo‘yicha qo‘mita, Savdo-sanoat palatasi, Yoshlar ittifoqi vakillari va jurnalistlar kiritilgan. Bu haqida “Daryo” muxbiri Azizjon Ermatov xabar bermoqda.
Respublika ishchi guruhi tomonidan o‘tkazilgan mehnat yarmarkasida 854 nafar fuqaro doimiy ish bilan ta’minlandi.
3 kun davom etgan mehnat yarmarkasida 132 ta korxona va tashkilot 1228 ta bo‘sh ish o‘rni bilan qatnashdi. Yarmarkada 343 nafar fuqaroga ishga joylashish uchun yo‘llanmalar berildi, 170 nafar fuqaro haq to‘lanadigan jamoat ishlariga jalb qilindi, 209 nafar xotin-qiz kasbga qayta tayyorlash uchun saralab olindi. “Har bir oila — tadbirkor” Davlat dasturi asosida 146 nafar fuqaroga imtiyozli kreditlar ajratildi.
— “Har bir oila — tadbirkor” dasturi asosida bankdan imtiyozli kredit mablag‘i olishni maqsad qilgandim. Bu niyatim shu bugunning o‘zida amalga oshdi va Xalq bankining tuman filiali tomonidan ajratilgan uch million so‘m miqdoridagi kredit mablag‘i hisobiga bir dona tikuv mashinasini sotib oldim. Endi o‘z xonadonimda bemalol chevarchilikni yo‘lga qo‘yishim mumkin, — deydi Ozodaxon Mirzakarimova.
Yarmarka yakunida tadbirkorlik faoliyatini boshlamoqchi bo‘lgan 25 nafar fuqaroga hamda kasbga qayta o‘qitish va malaka oshirish uchun ishsiz fuqarolarni jalb qilgan sakkiz nafar tadbirkorga eng kam oylik ish haqining uch baravari miqdorida imtiyozli sertifikatlar topshirildi.
Izoh (0)