Инновацион ривожланиш вазирлигида электрон тижорат соҳасидаги тадбиркорлар билан учрашув бўлиб ўтди. Тадбиркорларни вазир ўринбосари Азимжон Назаров қабул қилди. Бу ҳақда «Дарё»га вазирлик матбуот хизмати хабар берди.
Учрашув давомида Fom Group МЧЖ раҳбари М. Маҳкамов фармацевтика бизнесини автоматлаштириш ва дори воситаларининг ягона маълумотномасини яратиш лойиҳаси тақдимотини ўтказди. Лойиҳа дорихонани юритиш жараёни, дориларни етказиб бериш тизими, дорилар бўйича маълумотнома хизмати, дорихоналар ва улгуржи фармацевтика корхоналари учун универсал автобуюртма тизимини ўз ичига олади.
Бугунги кунга келиб мавжуд дастур Ўзбекистондаги 1610 та дорихонани қамраб олган, 300 та дорихона онлайн режимда фаолият юритмоқда, 10 000 номли товарларнинг тайёр базаси тузилган, турли хил иловалар 150000 нафар фойдаланувчиларга эга. Тадбиркорнинг эндиги мақсади бу дастурни янада мукаммаллаштириш ва уни янада кўпроқ дорихона ҳамда фармацевтика компанияларни қамраб олишини таъминлашдир.
Президентнинг «Фармацевтика тармоғини жадал ривожлантириш бўйича қўшимча чора-тадбирлар тўғрисида»ги қарорида дори воситалари ва тиббий буюмларни дорихоналар томонидан аҳолига етказиб беришни таъминлаган ҳолда реал вақт режимида сотиб олиш имкониятларни тақдим этадиган Интернет тармоғида ахборот порталини, шунингдек, мобил иловаларни яратиш вазифаси белгиланган. Бу вазифа эса қисман Fom Group МЧЖ томонидан амалга оширилган бўлиб, энди Соғлиқни сақлаш вазирлиги ва Ахборот технологиялари ва коммуникацияларини ривожлантириш вазирлиги билан ҳамкорлик ўрнатиш ва бу лойиҳани янада ривожлантириш талаб этилади.
Venkom МЧЖ бош директори А. Исмаилов ташкилотлараро электрон ҳужжатлар алмашинуви бўйича ишланмасини намойиш этди. Бу ҳар қандай эгалик шаклдаги ва масштабдаги корхоналар ўртасида юридик аҳамиятга эга ҳужжатларни қоғозсиз юргизишни ташкил этиш хизмати бўлиб, ҳисоб варақалари ва бошқа бирламчи ҳужжатлар билан тез ва ишончли алмашинувни таъминлайди, шунингдек ҳужжатларни имзолашда электрон-рақамли имзодан фойдаланилади. Бу ўз навбатида ҳужжатларни етказиб бериш ва имзолашга кетадиган вақтни қисқартиради, маблағларни тежайди, имзоларнинг хавфсизлик даражасини оширади, ҳужжатларни сақланишининг ишончлилигини таъминлайди.
Исмоилов Инновация вазирлигидан миллий иқтисодиётни рақамлаштириш учун масъул бўлган вазирлик ва идоралар билан ўзаро муносабатлар қуришда кўмак беришни сўради.
The Boss media group (Қозоғистон) корхонаси таъсисчиларидан бири М. Баришев қўшни мамлакатда муваффақиятли амалга оширилган лойиҳа — «Барчаси ҳисобчи учун» портали ҳақида сўзлаб берди. Мазкур порталда бухгалтерия ҳисоби, солиқлар, қонунлар, ижтимоий йўналишга эга нотижорат ташкилотлар, молиявий ҳисобот юритишнинг халқаро ва миллий стандартлари, шунингдек CAP ва CIPА ўқув материаллари, намунавий ҳужжатлар, турли саволлар жавоблар мавжуд.
Ўзбекистонда солиқ сиёсатини такомиллаштириш концепцияси ва Солиқ кодекси лойиҳасининг янги таҳрири ишлаб чиқилиши муносабати билан М. Баришев худди шундай порталнинг Ўзбекистонда ишга туширилиши катта имкониятлар эшигини очиб беришини таъкидлади. Шу ўринда корхона мазкур лойиҳани ўз маблағлари ҳисобидан амалга ошириши тўғрисида ҳам ахборот берилди.
Шунингдек, Баришев Ўзбекистонда ишлаб чиқариладиган экологик тоза маҳсулотлардан қуриладиган эко-офис учун ер майдони ажратилишига рухсат олишга кўмак беришни сўради. Мазкур эко-офисда муқобил электренергия манбаларидан ҳамда маиший мақсадларда тозаланган ёмғир сувидан фойдаланиш назарда тутилган бўлиб, бу табиий ресурсларни тежашга олиб келади.
Бу лойиҳа тадбиркорларга катта харажатлар талаб этмайдиган қурилиш намунасини намойиш этиш мақсадини ўз олдига қўйган бўлиб, шаҳарга ва давлатга катта фойда келтиради. Бу лойиҳани ҳам корхона ўз маблағлари ҳисобига амалга оширишни кўзлаган.
Инновацион ривожланиш вазирлиги юқоридаги лойиҳаларнинг барчасини қўллаб-қувватлаб, уларни ҳаётга татбиқ қилинишида амалий ёрдам бериш йўлида ҳаракатларни бошлаб юборди.
Изоҳ (0)