Toshkentdagi International Hotel Tashkent mehmonxonasining anjumanlar zalida o‘zbek-yapon biznes-forumi tashkil etildi. Bu haqda Investitsiyalar bo‘yicha davlat qo‘mitasi matbuot xizmati “Daryo”ga xabar bermoqda.
Forumda ishbilarmon doiralar vakillari, Yaponiyaning qator universitetlari vakillari hamda “Yaponiya-O‘zbekiston Ipak yo‘li” fondining tashqi savdo, investitsiya va infratuzilmalar bo‘yicha ishchi guruhi raisi, Marubeni korporatsiyasi maslahatchisi Mamoru Sekiyama boshchiligidagi delegatsiya a’zolari ishtirok etdi. Yaponiyaning Marubeni, “Shimitzu” korporatsiyalari, Japantobacco korxonasi, Kawasaki heavy industries va Sakai heavy industries og‘ir sanoat korxonalari hamda Yaponiya parlamentining quyi palatasi vakillari — jami 50 kishi qatnashdi.
Biznes forumda shuningdek, Tashqi aloqalar, savdo va investitsiyalar vazirligi, Savdo-sanoat palatasi, Toshkent shahar hokimligi, jamoat tashkilotlari hamda Yaponiyaning O‘zbekistondagi elchixonasi vakillari ishtirok etdi.
Anjumanda savdo-investitsiyaviy hamkorlik, yashil texnologiyalarni rivojlantirish hamda sog‘liqni saqlash masalalari muhokama qilindi.
O‘zbek-yapon biznes forumini JЕTRO (Yaponiya tashqi savdo tashkiloti) ning O‘zbekistondagi vakolatxonasi bosh direktori Manabu Shimoyashiro ochib berdi.
Forumda Investitsiyalar bo‘yicha davlat qo‘mitasi raisining birinchi o‘rinbosari Laziz Qudratov so‘zga chiqdi.
Shuningdek, “Yaponiya-O‘zbekiston Ipak yo‘li” jamg‘armasining tashqi savdo, investitsiya va infratuzilmalar bo‘yicha ishchi guruhi raisi Mamoru Sekiyama nutq so‘zladi.
— “Yaponiya-O‘zbekiston Ipak yo‘li” fondining tashqi savdo, investitsiya va infratuzilmalar bo‘yicha ishchi guruhi raisi sifatida ilk marta Toshkentga kelish menga mamnuniyat bag‘ishlaydi, — deydi Mamoru Sekiyama. — Ushbu tadbir tashkilotchilari — Investitsiyalar bo‘yicha davlat qo‘mitasiga o‘z minnatdorligimni bildiraman. Hozirda oldimizda 3 ta dolzarb vazifa bor: birinchisi — tegishli tashkilotlar bilan mustahkam aloqalarni yo‘lga qo‘yish. Ikkinchisi — mamlakatlarimiz o‘rtasidagi biznesga oid ma’lumot va axborot almashish tizimini yanada takomillashtirish. Uchinchisi — ikki tomonlama savdo, investitsiya va infratuzilma sohalaridagi aniq loyihalarni tadbiq etishni o‘rganish.
Izoh (0)