Тошкентда ўзбек-япон бизнес-форуми бўлиб ўтди

Тошкентдаги International Hotel Tashkent меҳмонхонасининг анжуманлар залида ўзбек-япон бизнес-форуми ташкил этилди. Бу ҳақда Инвестициялар бўйича давлат қўмитаси матбуот хизмати «Дарё»га хабар бермоқда.

Форумда ишбилармон доиралар вакиллари, Япониянинг қатор университетлари вакиллари ҳамда «Япония-Ўзбекистон Ипак йўли» фондининг ташқи савдо, инвестиция ва инфратузилмалар бўйича ишчи гуруҳи раиси, «Marubeni» корпорацияси маслаҳатчиси Мамору Секияма бошчилигидаги делегация аъзолари иштирок этди. Япониянинг  Marubeni, «Шимитзу» корпорациялари, Japantobacco корхонаси, Kawasaki heavy industries ва Sakai heavy industries оғир саноат корхоналари ҳамда Япония парламентининг қуйи палатаси вакиллари — жами 50 киши қатнашди.

Бизнес форумда шунингдек, Ташқи алоқалар, савдо ва инвестициялар вазирлиги, Савдо-саноат палатаси, Тошкент шаҳар ҳокимлиги, жамоат ташкилотлари ҳамда Япониянинг Ўзбекистондаги элчихонаси вакиллари иштирок этди.

Анжуманда савдо-инвестициявий ҳамкорлик, яшил технологияларни ривожлантириш ҳамда соғлиқни сақлаш масалалари муҳокама қилинди.

Ўзбек-япон бизнес форумини JETRO (Япония ташқи савдо ташкилоти) нинг Ўзбекистондаги ваколатхонаси бош директори Манабу Шимояширо очиб берди.

Форумда Инвестициялар бўйича давлат қўмитаси раисининг биринчи ўринбосари Лазиз Қудратов сўзга чиқди.

Шунингдек, «Япония-Ўзбекистон Ипак йўли» жамғармасининг ташқи савдо, инвестиция ва инфратузилмалар бўйича ишчи гуруҳи раиси Мамору Секияма нутқ сўзлади.

— «Япония-Ўзбекистон Ипак йўли» фондининг ташқи савдо, инвестиция ва инфратузилмалар бўйича ишчи гуруҳи раиси сифатида илк марта Тошкентга келиш менга мамнуният бағишлайди, — дейди Мамору Секияма. — Ушбу тадбир ташкилотчилари — Инвестициялар бўйича давлат қўмитасига ўз миннатдорлигимни билдираман. Ҳозирда олдимизда 3 та долзарб вазифа бор: биринчиси — тегишли ташкилотлар билан мустаҳкам алоқаларни йўлга қўйиш. Иккинчиси — мамлакатларимиз ўртасидаги бизнесга оид маълумот ва ахборот алмашиш тизимини янада такомиллаштириш. Учинчиси — икки томонлама савдо, инвестиция ва инфратузилма соҳаларидаги аниқ лойиҳаларни тадбиқ этишни ўрганиш.