Rossiyadagi “Rostov—Volgodonsk” yo‘lining Rostov viloyati Aksay tumanidan o‘tgan 11-kilometrida 30-iyul kuni “KAMAZ” yuk mashinasi salonida 9 nafar yo‘lovchi bo‘lgan Volkswagen Transporter mikroavtobusi bilan to‘qnashgan. YTH oqibatida uch kishi halok bo‘lgan, olti kishi turli darajada tan jarohati olgan. Halok bo‘lganlarning ikki nafari va jarohatlanganlarning uch nafari O‘zbekiston fuqarolari edi.
Hodisa oqibatida halok bo‘lgan o‘zbekistonliklar: Asatulla Eshbekovich Norbo‘tayev (1963-yilda tug‘ilgan), Shahnoza Abdulahatovna Sattorova (1985). Hodisa oqibatida jarohatlangan o‘zbekistonliklar: Saydulla Tajimatovich Saydamatov (1965), Jasur Ilhamovich Yunusov (1988), Saydulla Bobayevich Choriyev (1987)
Jarohatlanganlar Rostov viloyatining Aksay shahar markaziy kasalxonasiga yotqizilgan va ularga zarur tibbiy yordam ko‘rsatilmoqda.
Halok bo‘lgan ikki fuqaroning jasadlari 3-avgust kuni 22:10 da “O‘zbekiston havo yo‘llari” milliy aviakompaniyasining reysi bilan Toshkentga olib kelindi va qarindoshlariga topshirildi, deyiladi O‘zbekiston Favqulodda vaziyatlar vazirligi axborotida.
Izoh (0)