Toshkent shahrida joylashgan G‘afur G‘ulom nomidagi madaniyat va istirohat bog‘ida “Mustaqil yurt hunarmandlari” deb nomlangan xalq badiiy hunarmandligi va amaliy san’ati mahsulotlarining an’anaviy X ko‘rgazmasi o‘tkazildi. Bu haqda O‘zA xabar berdi.
O‘zbekiston Respublikasi “Hunarmand” uyushmasi, Madaniyat vazirligi hamda Turizmni rivojlantirish davlat qo‘mitasi hamkorligida tashkil etilgan ko‘rgazmada Qoraqalpog‘iston Respublikasi va barcha viloyatlardan 300 nafardan ziyod usta-hunarmand o‘z mahsulotlari bilan ishtirok etdi.
Ko‘rgazmada yog‘och o‘ymakorligi, tikuvchilik, zargarlik, to‘quvchilik va miniatyura san’ati kabi turli xil qo‘l mehnati mahsulotlari namoyish etildi. Shuningdek, ko‘rgazma doirasida hunarmandlarning mahorat darslari, madaniy-ko‘ngilochar tadbirlar, konsert dasturlari ham o‘tkazildi.
Uyushma tomonidan hunarmandlik mahsulotlarini xorijga eksport qilish va hunarmandlar faoliyatini yanada rivojlantirish maqsadida joriy yilda dunyoning 20 dan ortiq davlatida ko‘rgazma va yarmarkalar o‘tkazildi. Unda 50 dan ortiq hunarmand o‘z mahsulotlari bilan ishtirok etdi.
Izoh (0)