O‘zbekiston Xotin-qizlar qo‘mitasi tashabbusi bilan “Bizning jamiyatda har bir ayol davlat himoyasidadir!” shiori ostida Toshkent shahrining Qo‘yliq bozori atrofidagi norasmiy yollanma ish shoxobchalarida bir martalik ishda band bo‘luvchi xotin-qizlar bilan sayyor qabul tashkil etildi. Bu haqda “Daryo”ga qo‘mita matbuot bo‘limi ma’lum qildi.
Sayyor qabul tashkil qilinishidan oldin hafta davomida shoxobchadagi xotin-qizlarning har biri bilan alohida suhbat olib borildi va ularning muammolari o‘rganildi. Muloqotlarda asosiy muammolar ishsizlik, uy-joyining yo‘qligi, turmushidan ajralgani va boquvchisining yo‘qligi, norasmiy nikohlar va fuqarolik pasportining mavjud emasligidan iborat ekanligi aniqlandi.
Qo‘yliq bozoridagi norasmiy yollanma ish shohobchalarida faoliyat olib borayotgan ayollar soni 150 nafardan ortiq. Ular asosan Namangan, Farg‘ona, Andijon, Samarqand, Surxondaryo va Toshkent viloyatlaridan kelgan. Sayyor qabul davomida 112 nafar ayolning muammolari o‘rganildi. Bir kunning o‘zida 67 nafar ayolning muammolari bartaraf etildi.
Ma’lum bo‘lishicha, ularning aksariyati o‘z hududlaridagi Xalq qabulxonalariga murojaat qilgan, biroq muammolari o‘z yechimini topmagan. Shu tufayli muammolari hududlarda hal bo‘lishiga ishonchsizlik paydo bo‘lgan. Ushbu shoxobchalardagi ayollarning aksariyati viloyatlardan kelgan bo‘lib, ularda nafaqat ishsizlik masalasi, balki tibbiy, uy-joy, ijtimoiy va huquqiy muammolar borligi ham aniqlandi. Muammolarni bartaraf etish maqsadida O‘zbekiston xotin-qizlar qo‘mitasi va viloyatlar xotin-qizlar qo‘mitalari vakillari, IIB xodimlari, DSQ, Bandlikka ko‘maklashish markazi, Sog‘liqni saqlash bo‘limlaridan vakillar hozir bo‘ldi.
Birgina Andijon misolida olinadigan bo‘lsa, viloyatdan xotin-qizlar qo‘mitasi kotibiyat mudiri, Bandlikka ko‘maklashish markazi, prokuratura, IIB vakillari hamda viloyat bosh otinoyisi ishtirok etdi. Ular Qo‘yliq bozori atrofidagi norasmiy yollanma ish shoxobchalarida ishlayotgan xotin-qizlarning muammolarini joyida o‘rganib, ushbu muammolarni zudlik bilan hal qilish, Andijon viloyatidagi yashash manzillariga qaytarib, bandlik va uy-joy bilan ta’minlash choralarini ko‘rdi.
Shuningdek, viloyatdan kelgan mutasaddilar Toshkent shahrining boshqa tumanlaridagi ana shunday norasmiy mehnat shoxobchalariga borib, u yerda faoliyat olib borayotgan boshqa andijonlik ayollarni ham topib, o‘z oilalariga qaytarib, muammolarini barataraf etishlarini ma’lum qildi.
Joriy yilning 5 oyi mobaynida mamlakatda 131 mingdan ortiq ayol O‘zbekiston Xotin-qizlar qo‘mitasi tomonidan ish bilan ta’minlandi. Afsuski, Toshkentga vaqtincha ish izlab kelganning aksariyati o‘zlari istiqomat qilayotgan hududlarda hukumat tomonidan imkoniyatlar yaratilganidan, aholiga berilayotgan kreditlarning soliq stavkasi 4 foizgacha tushirilganligidan bexabar. Ayrim ayollar bir necha oy va undan ham ko‘proq vaqt davomida viloyatlariga bormagan, ko‘pchiligida fuqarolik pasporti mavjud emas va bu ularning ishga kirishda katta to‘siq bo‘lmoqda.
Ayollar orasida turli yoshdagi onaxonlar, yosh bolali ayollar, qizlar, hatto homilador ayollar bor ekanligi kishini tashvishga soldi. 62 yoshdagi onaxon turmush o‘rtog‘i vafot etgani, uy-joyga ehtiyoji borligini bildirdi. Ayrim kelinchaklar turmush o‘rtoqlarining zo‘ravonliklaridan Toshkentga qochib kelgani ma’lum bo‘ldi.
Tadbir davomida O‘zbekiston Xotin-qizlar qo‘mitasining tashabbusi bilan yana bir xayrli ishga qo‘l urildi. Ishsiz yurgan, qo‘lida hunari yo‘q qizlarga ma’lum yo‘nalishda hunar o‘rgatish va ularni qo‘shimcha daromad topa olishi uchun imkoniyat yaratish maqsadida ularni kerakli asbob-uskuna bilan ta’minlash rejalashtirildi.
Qo‘yliq bozori atrofidagi norasmiy yollanma ish shohobchalarida ishlayotgan xotin-qizlarni ish bilan ta’minlash va mehnat daftarchasini rasmiylashtirish, farzandlarini tashlab kelgan kelinchaklarni turmush o‘rtog‘i bilan yarashtirib, oilasi bag‘riga qaytarish, tibbiy ko‘rikdan o‘tkazish va boshqa ijtimoiy muammolarini bartaraf etish belgilab olindi. Sayyor qabul Toshkent shahrining Sergeli, Olmazor tumanlarida va Toshkent viloyatida ham reja asosida tizimli ravishda o‘tkazilishi yuzasidan kelishib olindi.
Izoh (0)