Ўзбекистон Хотин-қизлар қўмитаси ташаббуси билан «Бизнинг жамиятда ҳар бир аёл давлат ҳимоясидадир!» шиори остида Тошкент шаҳрининг Қўйлиқ бозори атрофидаги норасмий ёлланма иш шохобчаларида бир марталик ишда банд бўлувчи хотин-қизлар билан сайёр қабул ташкил этилди. Бу ҳақда «Дарё»га қўмита матбуот бўлими маълум қилди.
Сайёр қабул ташкил қилинишидан олдин ҳафта давомида шохобчадаги хотин-қизларнинг ҳар бири билан алоҳида суҳбат олиб борилди ва уларнинг муаммолари ўрганилди. Мулоқотларда асосий муаммолар ишсизлик, уй-жойининг йўқлиги, турмушидан ажралгани ва боқувчисининг йўқлиги, норасмий никоҳлар ва фуқаролик паспортининг мавжуд эмаслигидан иборат эканлиги аниқланди.
Қўйлиқ бозоридаги норасмий ёлланма иш шоҳобчаларида фаолият олиб бораётган аёллар сони 150 нафардан ортиқ. Улар асосан Наманган, Фарғона, Андижон, Самарқанд, Сурхондарё ва Тошкент вилоятларидан келган. Сайёр қабул давомида 112 нафар аёлнинг муаммолари ўрганилди. Бир куннинг ўзида 67 нафар аёлнинг муаммолари бартараф этилди.
Маълум бўлишича, уларнинг аксарияти ўз ҳудудларидаги Халқ қабулхоналарига мурожаат қилган, бироқ муаммолари ўз ечимини топмаган. Шу туфайли муаммолари ҳудудларда ҳал бўлишига ишончсизлик пайдо бўлган. Ушбу шохобчалардаги аёлларнинг аксарияти вилоятлардан келган бўлиб, уларда нафақат ишсизлик масаласи, балки тиббий, уй-жой, ижтимоий ва ҳуқуқий муаммолар борлиги ҳам аниқланди. Муаммоларни бартараф этиш мақсадида Ўзбекистон хотин-қизлар қўмитаси ва вилоятлар хотин-қизлар қўмиталари вакиллари, ИИБ ходимлари, ДСҚ, Бандликка кўмаклашиш маркази, Соғлиқни сақлаш бўлимларидан вакиллар ҳозир бўлди.
Биргина Андижон мисолида олинадиган бўлса, вилоятдан хотин-қизлар қўмитаси котибият мудири, Бандликка кўмаклашиш маркази, прокуратура, ИИБ вакиллари ҳамда вилоят бош отинойиси иштирок этди. Улар Қўйлиқ бозори атрофидаги норасмий ёлланма иш шохобчаларида ишлаётган хотин-қизларнинг муаммоларини жойида ўрганиб, ушбу муаммоларни зудлик билан ҳал қилиш, Андижон вилоятидаги яшаш манзилларига қайтариб, бандлик ва уй-жой билан таъминлаш чораларини кўрди.
Шунингдек, вилоятдан келган мутасаддилар Тошкент шаҳрининг бошқа туманларидаги ана шундай норасмий меҳнат шохобчаларига бориб, у ерда фаолият олиб бораётган бошқа андижонлик аёлларни ҳам топиб, ўз оилаларига қайтариб, муаммоларини баратараф этишларини маълум қилди.
Жорий йилнинг 5 ойи мобайнида мамлакатда 131 мингдан ортиқ аёл Ўзбекистон Хотин-қизлар қўмитаси томонидан иш билан таъминланди. Афсуски, Тошкентга вақтинча иш излаб келганнинг аксарияти ўзлари истиқомат қилаётган ҳудудларда ҳукумат томонидан имкониятлар яратилганидан, аҳолига берилаётган кредитларнинг солиқ ставкаси 4 фоизгача туширилганлигидан бехабар. Айрим аёллар бир неча ой ва ундан ҳам кўпроқ вақт давомида вилоятларига бормаган, кўпчилигида фуқаролик паспорти мавжуд эмас ва бу уларнинг ишга киришда катта тўсиқ бўлмоқда.
Аёллар орасида турли ёшдаги онахонлар, ёш болали аёллар, қизлар, ҳатто ҳомиладор аёллар бор эканлиги кишини ташвишга солди. 62 ёшдаги онахон турмуш ўртоғи вафот этгани, уй-жойга эҳтиёжи борлигини билдирди. Айрим келинчаклар турмуш ўртоқларининг зўравонликларидан Тошкентга қочиб келгани маълум бўлди.
Тадбир давомида Ўзбекистон Хотин-қизлар қўмитасининг ташаббуси билан яна бир хайрли ишга қўл урилди. Ишсиз юрган, қўлида ҳунари йўқ қизларга маълум йўналишда ҳунар ўргатиш ва уларни қўшимча даромад топа олиши учун имконият яратиш мақсадида уларни керакли асбоб-ускуна билан таъминлаш режалаштирилди.
Қўйлиқ бозори атрофидаги норасмий ёлланма иш шоҳобчаларида ишлаётган хотин-қизларни иш билан таъминлаш ва меҳнат дафтарчасини расмийлаштириш, фарзандларини ташлаб келган келинчакларни турмуш ўртоғи билан яраштириб, оиласи бағрига қайтариш, тиббий кўрикдан ўтказиш ва бошқа ижтимоий муаммоларини бартараф этиш белгилаб олинди. Сайёр қабул Тошкент шаҳрининг Сергели, Олмазор туманларида ва Тошкент вилоятида ҳам режа асосида тизимли равишда ўтказилиши юзасидан келишиб олинди.
Изоҳ (0)