Misr prokuraturasi futbol bo‘yicha mamlakat milliy terma jamoasining Rossiyadagi jahon chempionatidagi ishtiroki vaqtida byudjet mablag‘lari talon-toroj etilgani ehtimoli yuzasidan tekshiruv boshladi. Bu haqda “Kommersant” xabar bermoqda.
Xabar berishlaricha, Misr bosh prokurori Nabil Sodiq deputat Muhammad an-Nimrning so‘rovi asosida tekshiruv o‘tkazish haqida ko‘rsatma bergan. Nimrning ta’kidlashicha, Misr futbol federatsiyasi rahbari va uning a’zolari katta miqdordagi davlat mablag‘larini o‘zlashtirgan.
“So‘rovda nomlari zikr etilgan shaxslar Misr terma jamoasining Rossiyada yashashi uchun davlat tomonidan ajratilgan 1,8 million dollar pulni o‘zlashtirgan. Vaholanki, Misr terma jamoasining yashashi uchun joy Checheniston rahbari tomonidan bepul taqdim etilgan”, — deyiladi xabarda.
Avvalroq Misr parlamentining yoshlar va sport ishlari bo‘yicha qo‘mitasi mamlakat milliy terma jamoasining JCH—2018 dagi muvaffaqiyatsiz ishtiroki sabablarini aniqlash yuzasidan surishtiruv olib borishi xabar qilingan edi. Sabablardan biri sifatida terma jamoa delegatsiyasi o‘yinlar bo‘ladigan shaharlardan uzoqda yashagani ham aytilmoqda.
Bundan tashqari parlament qo‘mitasi 23 iyun kuni Misr terma jamoasi futbolchilari va Checheniston rahbari Ramzan Qodirov ishtirokida bo‘lib o‘tgan tantanali tushlik Misr futbol termasi obro‘siga qanday va qanchalik ta’sir ko‘rsatganini ham tekshirib chiqish niyatida.
Izoh (0)