Франциянинг Cluster Montagne компанияси Чорвоқ — Чимён — Белдирсой зонасида тоғ туризмини ривожлантириш ишларини кучайтирмоқда. Бу ҳақда шу кунларда Францияда бўлиб турган бир қатор ўзбек ОАВларига компания мутахассислари маълум қилди.
Ўзбекистондаги объектлар билан танишув 2013 йилдаёқ бўлган, аммо фаоллик 2017 йилдагина бошланган. Ўзбекистон томони тоғ туризмини ривожлантириш бўйича техник-иқтисодий асос учун айнан шу компанияга мурожаат қилган.
Франциядаги Шамони курорт зонаси тақдимотида компания вакиллари Чорвоқ, Чимён ва Белдирсой ҳудудларида туризм саноатини модернизация қилиш бўйича ўз фикрлари ҳақида гапириб берди. Айни пайтда инвестор корхоналар гуруҳи яратилган бўлиб, Франция ҳукумати билан ғояни қўллаб-қувватлаш ҳақида музокаралар олиб борилмоқда.
Лойиҳа Чорвоқ — Чимён — Белдирсой ягона тоғ туризми тизимини яратишни, объектларнинг ноёб табиий манзаралари мафтункорлигини илгари суришни, кенг кўламли қурилишда тартибсизликларни истисно қилишни, пиёда сайр қилиш йўналишларини яратишни кўзда тутади.
«Фақат кўнгилочар мажмуаларга урғу бериш етарли эмас. Ҳар битта детали ўзаро уйғунлашган тўла сифатли инфратузилма яратиш зарур. Бу ҳам сифатли йўллар, ҳам замонавий меҳмонхоналар тармоғи демакдир, — деди компания менежерлари. — Биз экомувозанатни сақлаш бўйича мутахассисларни тайёрлашда ҳам ёрдам беришга тайёрмиз».
Журналистларга Шамони курорт зонаси мисолида қулай тоғ туризми зонасини қандай яратишни кўрсатиб беришди.
Франция ялпи ички маҳсулотида туризм улуши 10 фоизга тенг, ушбу соҳа жами иш ўринларининг 7 фоизини беради.
Алишер Азимов
Изоҳ (0)