Namangan viloyatida yuridik kollej direktori vazifasini bajaruvchi Nodira Mirzaolimova o‘z qo‘li ostidagi o‘qituvchilarni haqorat qilishda aybli deb topildi va jarimaga tortildi. Bu haqda UzNews xabar berdi.
Namangan qurilish va ijtimoiy-iqtisodiyot kasb-hunar kollejida ma’naviyat ishlari bo‘yicha direktor o‘rinbosari lavozimida ishlagan vaqtida Nodira Mirzaolimova hamkasbini haqorat qilgani uchun ma’muriy jazoga tortilgan. Keyinchalik yuridik kollej direktori vazifasini bajaruvchi etib tayinlanganda kollej o‘qituvchilarini umumiy yig‘ilishlarda bir necha marotaba uyatli so‘zlar bilan haqoratlagan, shuningdek, millatchilik qilib, inson sha’ni va qadr-qimmatini qasddan tahqirlagan.
Mazkur holat yuzasidan 2017-yil 15-noyabrda Namangan shahar IIB huzuridagi tergov bo‘limi tomonidan N.Mirzaolimovaga nisbatan Jinoyat kodeksining 140-moddasi 1-qismiga (haqorat qilish) ko‘ra jinoyat ishi qo‘zg‘atilgan.
Natijada Mirzaolimova Jinoyat kodeksining 140-moddasi 3-qismi “A” bandiga ko‘ra aybli deb topilib, jarimaga tortildi.
Xabar qilinishicha, ushbu holatlar bo‘yicha o‘qituvchilar Namangan shahar va Namangan viloyati prokuraturasiga murojaat qilishgan. Biroq jinoyat ishi O‘zbekiston Respublikasi Bosh prokuraturasiga murojaat qilingandan keyin qo‘zg‘atilgan.
Izoh (0)