Наманган вилоятида юридик коллеж директори вазифасини бажарувчи Нодира Мирзаолимова ўз қўли остидаги ўқитувчиларни ҳақорат қилишда айбли деб топилди ва жаримага тортилди. Бу ҳақда UzNews хабар берди.
Наманган қурилиш ва ижтимоий-иқтисодиёт касб-ҳунар коллежида маънавият ишлари бўйича директор ўринбосари лавозимида ишлаган вақтида Нодира Мирзаолимова ҳамкасбини ҳақорат қилгани учун маъмурий жазога тортилган. Кейинчалик юридик коллеж директори вазифасини бажарувчи этиб тайинланганда коллеж ўқитувчиларини умумий йиғилишларда бир неча маротаба уятли сўзлар билан ҳақоратлаган, шунингдек, миллатчилик қилиб, инсон шаъни ва қадр-қимматини қасддан таҳқирлаган.
Мазкур ҳолат юзасидан 2017 йил 15 ноябрда Наманган шаҳар ИИБ ҳузуридаги тергов бўлими томонидан Н.Мирзаолимовага нисбатан Жиноят кодексининг 140-моддаси 1-қисмига (ҳақорат қилиш) кўра жиноят иши қўзғатилган.
Натижада Мирзаолимова Жиноят кодексининг 140-моддаси 3-қисми «А» бандига кўра айбли деб топилиб, жаримага тортилди.
Хабар қилинишича, ушбу ҳолатлар бўйича ўқитувчилар Наманган шаҳар ва Наманган вилояти прокуратурасига мурожаат қилишган. Бироқ жиноят иши Ўзбекистон Республикаси Бош прокуратурасига мурожаат қилингандан кейин қўзғатилган.
Изоҳ (0)