Фуқаро таклифи: «Алиментни ҳам ота, ҳам она тўлашини жорий қилиш керак»
Май ойининг охирги ўн кунлигида Ўзбекистон Республикаси Олий Мажлиси Қонунчилик палатаси депутатлари ва Сенати аъзоларидан иборат ишчи гуруҳи Наманган вилоятининг Норин туманида бўлиб, аҳоли вакиллари билан бевосита мулоқот қилди, деб ёзади ЎзА.
Фото: Flickr
Жумладан, ишчи гуруҳи таркибидан ўрин олган Ўзбекистон «Миллий тикланиш» демократик партияси фракцияси аъзолари Акмал Раҳмонов, Шуҳрат Тўхтабоев ва Нодиржон Мухторов ҳам одамларнинг турмуш даражасини оширишга ҳалақит бераётган муаммолар, фуқароларни ўйлантираётган масалаларни ижобий ҳал этишга яқиндан кўмаклашди. Қуйи парламент вакилларига халқ депутатлари туман Кенгаши депутатлари, маҳаллий давлат ҳокимияти органлари ва тегишли ташкилотлар масъул ходимлари ҳамроҳлик қилди.
Хусусан, Олий Мажлис Қонунчилик палатаси депутати Нодиржон Мухторов туман ҳокими сектори ҳудудига тегишли Қўрғонтепа қишлоғидаги маҳаллалардаги аҳоли хонадонларида фуқаролар билан юзма-юз мулоқотда бўлди. Уларнинг шикоятлари, талаб ва таклифлари тингланди.
Депутат Нодиржон Мухторовга турли йўналишлар бўйича мурожаат қилган фуқаролар жамиятда кечаётган ислоҳотлар, хусусан Ўзбекистон Республикаси Олий Мажлиси Сенатининг тўй ва маросимларни тартибга солишга қаратилган қарори лойиҳаси, оилаларнинг аҳил ва тотувлигини таъминлаш, ажримларнинг олдини олиш борасида ҳам бир қатор ўринли таклиф ва мулоҳазаларини билдирди.
Танзила Қосимованинг айтишича, кейинги пайтларда тўй ва маъракаларни ўтказишда «ким ўзарга» қабилида иш тутишдек иллатларга йўл қўйилмоқда. Айниқса, ўзига тўқ хонадонлардаги дабдабага берилишдан «ўрнак» олаётган ўртаҳол оилаларда тўйдан кейин турли кўнгилсиз ҳолатлар юзага келмоқда. Сенат қарори лойиҳасида қайд этилган вазифаларга оғишмай амал қилиш келгусида бундай камчиликларни бартараф этилишида айни муддао бўлади.
– Бугунги кунда алиментнинг фақатгина оталардан ундирилиши барчага маълум. Таклифим алиментни ҳам ота, ҳам она тўлашини жорий қилиш керак. Бу маблағларни болалари учун жамғариш керак, – дейди у.
Фуқаролар томонидан билдирилган бу каби ўнга яқин таклиф-мулоҳазаларни тинглаган Нодир Мухторов бу масалаларни парламент қуйи палатасида муҳокама учун олиб чиқишини маълум қилди.
Изоҳ (0)