26-may kuni Buxoro shahrida Xalq deputatlari viloyat Kengashi hamda hududlarda jinoyatchilikning barvaqt oldini olish va huquqbuzarlikka qarshi kurashish Respublika komissiyasining qo‘shma yig‘ilishi o‘tkazilib, unda viloyat hududida o‘tgan davrda huquqbuzarliklar profilaktikasi borasida amalga oshirilayotgan ishlar ahvoli va belgilangan vazifalar ijrosi muhokama etildi. Bu haqda IIV matbuot xizmati xabar bermoqda.
Tanqidiy ruhda o‘tkazilgan selektor yig‘ilishini O‘zbekiston Respublikasi Oliy Majlisi Senati raisi, hududlarda jinoyatchilikning barvaqt oldini olish va huquqbuzarlikka qarshi kurashish Respublika komissiyasi raisi Nig‘matilla Yo‘ldoshev olib bordi. Viloyat xalq deputatlari, huquqni muhofaza qiluvchi organlari, jamoat tashkilotlari va boshqa mutasaddi tashkilotlar rahbarlari ishtirok etgan mazkur yig‘ilishni kirish so‘zi bilan Buxoro viloyati hokimi O‘ktam Barnoyev ochib berdi.
Viloyatning shahar-tumanlari rahbarlari hududiy studiyalardan qatnashishlari ta’minlandi. O‘tkazilgan qo‘shma yig‘ilishda hududlarda jinoyatchilikning barvaqt oldini olish va huquqbuzarlikka qarshi kurashish Respublika komissiyasining II mintaqaviy guruhi rahbari, O‘zbekiston Respublikasi Ichki ishlar vaziri general-mayor Po‘lat Bobojonov ma’ruza qilib, Buxoro viloyatida o‘tgan davrda jinoyatchilikka qarshi kurashish va huquqbuzarliklar profilaktikasi borasida erishilgan natijalar va sohada yo‘l qo‘yilgan kamchiliklar to‘g‘risida so‘z yuritdi.
Ta’kidlandiki, Buxoro viloyati bo‘yicha belgilangan dasturlar ijrosi doirasida, 2018-yilning 4-oyi davomida 559 nafar profilaktik hisobda turgan, 58 nafar diniy-ekstremistik oqimga mansub, 559 nafar jinoyat sodir qilishga moyil, 150 nafar giyohvand va spirtli ichimlikka ruju qo‘ygan shaxslar, 281 nafar notinch oilalar, 5879 nafar ishsiz fuqarolar, 233 nafar uyushmagan yoshlar, 351 ta kam ta’minlangan va ehtiyojmand oilalar ro‘yxatlari shakllantirilib, manzilli profilaktik tadbirlar o‘tkazish, muammolarning aniq yechimini topish maqsadida sektor rahbarlari hamda tegishli mutasaddi idoralar rahbarlariga taqdim etildi.
Olib borilgan kompleks tadbirlar davomida viloyatning 13 ta shahar-tumanlarida 47 marotaba mehnat yarmarkalari o‘tkazilib, 4623 nafar aholining zaif qatlamiga kiruvchi ishsizlar ishga joylashtirildi. Aholi bilan o‘tkazilgan manzilli tushuntirish-targ‘ibot ishlari davomida 336 ta notinch oilalar yarashtirilib, 149 ta nizoli oilalarning notinchligiga barham berildi.
Mulkiy turdagi jinoyatlarning oldini olish maqsadida ko‘p qavatli uylarning 225 tasiga videokameralar o‘rnatildi, 935 ta obyektlar qo‘riqlash pultiga ulandi. Viloyatdagi mahallalarda 560 ta jamoatchilik nazorat maskanlari faoliyati yo‘lga qo‘yilib, har kuni o‘rta hisobda 1700 nafardan ortiq mahalla va jamoatchilik vakillari jalb qilinmoqda.
Izoh (0)