Jinoyat ishlari bo‘yicha Paxtakor tuman sudining Mingchinor qishloq fuqarolar yig‘ini binosida bo‘lib o‘tgan ochiq sud majlisida sudlanuvchilar A.B., N.I., A.H. va O‘.Q. ning qilmishiga oid jinoyat ishi ko‘rib chiqildi. Bu haqda “Xabar.uz” ma’lum qildi.
Uyushgan guruh aholining eshaklarini o‘g‘irlash va so‘yib, terisini o‘rtacha 150 ming so‘mdan pullash bilan shug‘ullanib kelgani aniqlangan.
Jumladan, Paxtakor tumanidagi “Cho‘ldagi lola” fermer xo‘jaligi dalasida yurgan, E. Qosimovga tegishli bo‘lgan ikki eshakni o‘g‘irlab ketgan. Shuningdek, guruh a’zolari jabrlanuvchi Sh. Muhiddinovning Paxtakor tumanidagi “Yashil bo‘ston yaprog‘i” fermer xo‘jaligi yer maydoni chetiga bog‘lab qo‘yilgan eshagini ham o‘g‘irlab ketgan.
Eshak egasi ertalab jonivor o‘rnida yo‘qligini bilib, atrofni izlab ko‘rgan, lekin, topa olmagach, atrofdagilardan so‘ragan. Mahallada yashovchi bolalardan biri kelib, unga dalaning chetida go‘sht borligini aytganida u eshagini oyog‘idagi ipidan tanidi va uni kimdir so‘yib, terisini ajratib olib ketganini aniqladi. Bu ish ham mazkur jinoiy guruh tomonidan amalga oshirilgani o‘z tasdig‘ini topdi.
Sud A.B., N.I., A.H., O‘.Q.ni Jinoyat kodeksining 169-moddasi 2-qismi “v” bandi bilan aybli deb topdi va 2 yil axloq tuzatish ishlari jazosi tayinladi. Shuningdek, ularning oylik ish haqining 30 foizi davlat daromadiga ushlab qolinadi.
Izoh (0)