26 май куни Бухоро шаҳрида Халқ депутатлари вилоят Кенгаши ҳамда ҳудудларда жиноятчиликнинг барвақт олдини олиш ва ҳуқуқбузарликка қарши курашиш Республика комиссиясининг қўшма йиғилиши ўтказилиб, унда вилоят ҳудудида ўтган даврда ҳуқуқбузарликлар профилактикаси борасида амалга оширилаётган ишлар аҳволи ва белгиланган вазифалар ижроси муҳокама этилди. Бу ҳақда ИИВ матбуот хизмати хабар бермоқда.
Танқидий руҳда ўтказилган селектор йиғилишини Ўзбекистон Республикаси Олий Мажлиси Сенати раиси, ҳудудларда жиноятчиликнинг барвақт олдини олиш ва ҳуқуқбузарликка қарши курашиш Республика комиссияси раиси Ниғматилла Йўлдошев олиб борди. Вилоят халқ депутатлари, ҳуқуқни муҳофаза қилувчи органлари, жамоат ташкилотлари ва бошқа мутасадди ташкилотлар раҳбарлари иштирок этган мазкур йиғилишни кириш сўзи билан Бухоро вилояти ҳокими Ўктам Барноев очиб берди.
Вилоятнинг шаҳар-туманлари раҳбарлари ҳудудий студиялардан қатнашишлари таъминланди. Ўтказилган қўшма йиғилишда ҳудудларда жиноятчиликнинг барвақт олдини олиш ва ҳуқуқбузарликка қарши курашиш Республика комиссиясининг II минтақавий гуруҳи раҳбари, Ўзбекистон Республикаси Ички ишлар вазири генерал-майор Пўлат Бобожонов маъруза қилиб, Бухоро вилоятида ўтган даврда жиноятчиликка қарши курашиш ва ҳуқуқбузарликлар профилактикаси борасида эришилган натижалар ва соҳада йўл қўйилган камчиликлар тўғрисида сўз юритди.
Таъкидландики, Бухоро вилояти бўйича белгиланган дастурлар ижроси доирасида, 2018 йилнинг 4-ойи давомида 559 нафар профилактик ҳисобда турган, 58 нафар диний-экстремистик оқимга мансуб, 559 нафар жиноят содир қилишга мойил, 150 нафар гиёҳванд ва спиртли ичимликка ружу қўйган шахслар, 281 нафар нотинч оилалар, 5879 нафар ишсиз фуқаролар, 233 нафар уюшмаган ёшлар, 351 та кам таъминланган ва эҳтиёжманд оилалар рўйхатлари шакллантирилиб, манзилли профилактик тадбирлар ўтказиш, муаммоларнинг аниқ ечимини топиш мақсадида сектор раҳбарлари ҳамда тегишли мутасадди идоралар раҳбарларига тақдим этилди.
Олиб борилган комплекс тадбирлар давомида вилоятнинг 13 та шаҳар-туманларида 47 маротаба меҳнат ярмаркалари ўтказилиб, 4623 нафар аҳолининг заиф қатламига кирувчи ишсизлар ишга жойлаштирилди. Аҳоли билан ўтказилган манзилли тушунтириш-тарғибот ишлари давомида 336 та нотинч оилалар яраштирилиб, 149 та низоли оилаларнинг нотинчлигига барҳам берилди.
Мулкий турдаги жиноятларнинг олдини олиш мақсадида кўп қаватли уйларнинг 225 тасига видеокамералар ўрнатилди, 935 та объектлар қўриқлаш пультига уланди. Вилоятдаги маҳаллаларда 560 та жамоатчилик назорат масканлари фаолияти йўлга қўйилиб, ҳар куни ўрта ҳисобда 1700 нафардан ортиқ маҳалла ва жамоатчилик вакиллари жалб қилинмоқда.
Изоҳ (0)