O‘zbekistonning Turkiyadagi elchixonasida o‘z davrining zabardast olimlaridan biri Abu Bakr Saraxsiyning xalqaro huquq, diplomatiya huquqi sohasidagi qarashlariga oid ilmiy seminar tashkil etildi. Bu haqda O‘zA xabar berdi.
Joriy yil 11-yanvarda O‘zbekiston Prezidenti Shavkat Mirziyoyev boshchiligida Tashqi ishlar vazirligi va mamlakatning xorijiy davlatlardagi vakolatxonalari faoliyatiga bag‘ishlangan yig‘ilish o‘tkazilgan edi. Majlisda diplomatiya sohasidagi qator dolzarb masalalar sirasida ushbu yo‘nalishda kadrlar tayyorlash, bu borada buyuk ajdodlarning boy tarixiy merosini o‘rganish lozimligi qayd etilgandi.
O‘zbekistonning xorijdagi vakolatxonalari ushbu vazifalardan kelib chiqib xalqimizning diplomatiya sohasidagi ilmiy-tarixiy merosini o‘rganishga e’tibor qaratmoqda.
Tadbirda O‘zbekistonning Turkiyadagi Favqulodda va muxtor elchisi Alisher A’zamxo‘jayev o‘zbek diplomatiyasi tarixini o‘rganish va yuzaga chiqarish chet elda xizmat qilayotgan diplomatlarni ruhlantirishini ta’kidladi.
Seminarda Anqara universiteti Ijtimoiy fanlar instituti doktoranti Abdulmalik To‘ychiboyev Saraxsiyning hayoti, ilmiy merosi, islom huquqshunosligi asosida deyarli ming yil oldin ilgari surgan diplomatiyaga oid fikrlari haqida ma’ruza qildi.
1010-yilda Saraxs shahrida tug‘ilgan Abu Bakr Saraxsiy yoshligida ilm talabi bilan Buxoroga kelgan. Bu yerda o‘z davrining allomalari bo‘lgan Abdulaziz Halvoniy va qozikalon Rukniddin So‘g‘diydan ta’lim olgan. Ustozlaridan so‘ng mamlakatning eng ilg‘or olimi darajasiga yetgan.
Saljuqiylar saltanatida voyaga yetgan alloma islom olamida mashhur “Usul”, “Mabsut” va “Sharh as-siyar al-kabir” asarlarini yozgan. Bular ichida “Mabsut” va ayniqsa, “Sharh as-siyar al-kabir” asarlarida o‘z davrining xalqaro huquq qoidalari, jumladan, elchilik munosabatlariga oid tartiblar chuqur tahlil etilgan.
Tadbirda Abu Bakr Saraxsiyning yozgan asarlari, ayniqsa 30 jildli “Mabsut” asari hali-hanuz Turkiya va boshqa qator xorijiy davlatlarda qadimiy ilmiy manba sifatida xizmat qilib kelayotgani ta’kidlandi.
Interfaol muloqot shaklida o‘tkazilgan seminar yakunida Abu Bakr Saraxsiy kabi ajdodlar merosi bilan keng ommani tanishtirish muhimligi qayd etildi.
Izoh (0)