Toshkentda yashovchi otaxonning 4 nafar o‘g‘li bor, u ayni farzandlar rohat-farog‘atini ko‘rib, umrguzaronlik qiladigan yoshda. Biroq musofirlikda yurgan o‘g‘illari diniy-ekstremistik guruhga aloqadorlikda gumon qilingani sabab O‘zbekistonga qayta olmayotganlaridan armonda edi. Bu haqda O‘zA muxbiri Anora Sodiqova hikoya qilmoqda.
Ushbu fuqaroning ikki nafar katta o‘g‘li 2013-yildan buyon Turkiyada savdo ishlari bilan shug‘ullanib kelgan. Ma’lum bo‘lishicha, kichik o‘g‘il ko‘chada qilgan bezoriligi sabab ichki ishlar idorasi tomonidan qo‘lga olinishidan cho‘chib, Dubayga ketib qoladi. Keyinchalik u yerdan Turkiyaga ishlagani ketadi va 2013-yilda akasini ham yoniga chaqiradi. Aka-uka u yerda tijorat bilan shug‘ullanib kelgan va dam oliish kunlari Istanbuldagi o‘zbekistonlik hamyurtlari bilan tamaddixonalarda yig‘ilishgan.
Hamyurtlar yig‘ilgan vaqtlarida diniy mavzularda suhbat qilganlar. 2015- yilga kelib, ularni tanigan yigitlar Jinoyat kodeksining 244-moddasi bilan (diniy ekstremizmga aloqadorlik bo‘yicha) O‘zbekistonda qo‘lga olingan. Ular shu ikki yigit bilan hamsuhbat bo‘lganlarini ham aytgan hamda ular haqida yana boshqa ko‘rsatmalar ham bergan.
Oqibatda toshkentlik aka-uka ham shu modda bo‘yicha jinoyat ishi ochilib, ular qidiruvga berilgan. Ota olisdagi o‘g‘illari bilan gaplashib, ularning bu ishda aybdor emasliklarini aytib, bir nechta joyga xat bilan chiqib, ikki yildan ortiq ovora bo‘ladi. 2018-yilga kelib, akaga afv e’lon qilinib, u Toshkentga qaytib keladi.
Afv etilgan aka Toshkent xalqaro aeroportidan to‘g‘ri uyga kelganini, ichki ishlar idorasiga olib ketilmaganini aytadi: “2015-yilda menga nisbatan 244-modda bo‘yicha ish qo‘zg‘alganini eshitib, to‘g‘risi, Vatanga qaytish umidimni uzgan edim. Ammo 2018-yilda Prezident tomonidan afv e’lon qilinayotgani, bemalol yurtimga qaytishim va ozodlikda bo‘lishim mumkinligini eshitib, quvonchim ichimga sig‘madi. O‘sha yerdan turib, afv so‘rab xat yozdim. Boshimdan o‘tganlarni yolg‘on aralashtirmay borini hikoya qilib berdim. Meni avf etishdi. Musofirlikda yurtimni qattiq sog‘ingan edim. Mana, uyga qaytganimga 10 kundan oshdi. Endi bu yerda yangi biznes boshlash niyatidaman”, deydi u.
Prezident tomonidan berilgan afv sabab bugun Toshkentlik otaxonning farzandi yonida, kelajakka rejalar tuzmoqda. “Agar kichkina o‘g‘limga ham afv e’lon qilinsa, u ham bag‘rimga qaytardi. Uning diniy oqimlarga aloqadorligi bo‘lmagan”, deydi ota.
“Otaxonning o‘g‘illari kabi tijoriy ish bilan xorijga ketib, bilib-bilmay diniy ekstremistlar domiga tushib qolgan yoki ular bilan aloqaga kirishib, aybdorlar safiga qo‘shilib qolgan hamyurtlarimiz bugun afv so‘rab yurtimizga qaytmoqda. Qo‘li qonga botmagan bo‘lsa, afv etiladi, hech qanday tergovlarga tortilmaydi. Qidiruvda bo‘lib, qaytgan yurtdoshlarimizga bugun imtiyozli uy olishda, ishga kirishda yordam berilmoqda”, deydi Toshkent shahar hokimining jamoat va diniy tashkilotlar bo‘yicha o‘rinbosari Shuhrat Turdiqulov.
Izoh (0)