22-may kuni Bosh prokuraturada O‘zbekiston Respublikasi Prezidentining 2018-yil 14-fevraldagi “Farmatsevtika tarmog‘ini jadal rivojlantirish bo‘yicha qo‘shimcha chora-tadbirlar to‘g‘risida”gi PQ-3532-son qarori ijrosiga bag‘ishlangan videoselektor yig‘ilishi bo‘lib o‘tdi. Bu haqda Bosh prokuratura matbuot xizmati xabar bermoqda.
O‘zbekiston Respublikasi Bosh prokurori raisligida o‘tgan mazkur yig‘ilishda O‘zbekiston Respublikasi Prezidentining Davlat maslahatchisi Rustam Qosimov, Bosh vazir o‘rinbosari Qahramon Akmalov, O‘zbekiston kasaba uyushmalari federatsiyasi kengashi raisi Qudratilla Rafiqov, sohaga aloqador vazirlik va idoralarning rahbarlari, shuningdek ularning quyi tuzilma va tarmoqlari vakillari ishtirok etdi.
“Yig‘ilishda farmatsevtika tarmog‘ini jadal rivojlantirish, farmatsevtika erkin iqtisodiy zonalari faoliyatini tashkil etish, aholini arzon, sifatli hamda zarur dori vositalari va tibbiy buyumlar bilan kafolatli ta’minlash, ijtimoiy dorixonalarni tashkil qilish borasidagi vazifalar ijrosi tanqidiy muhokama qilindi.
Ta’kidlanganidek, amalga oshirilgan keng qamrovli ishlar bilan bir qatorda, tibbiyot muassasalariga farmatsevtika vositalarini yetkazib berish, dorixonalarni ijtimoiy ahamiyatga ega dori vositalari bilan uzluksiz ta’minlash, dori vositalari va tibbiy buyumlar narxlarining barqarorligini saqlash borasida kamchiliklarga yo‘l qo‘yilgan”, — deyiladi xabarda.
Yig‘ilishda Sog‘liqni saqlash vazirligi, Farmatsevtika tarmog‘ini rivojlantirish agentligi, “Uzmedimpeks” davlat unitar korxonasi, “Dori-darmon” aksiyadorlik jamiyati hamda boshqa idoralar va hududiy prokuratura organlari rahbarlarining hisobotlari eshitildi.
Mutasaddi vazirlik va idoralarning rahbarlariga belgilangan vazifalarni bajarishda sustkashlikka yo‘l qo‘yganliklari ko‘rsatib o‘tilib, aniqlangan kamchiliklarni bartaraf etmagan taqdirda qat’iy choralar ko‘rilishi to‘g‘risida ogohlantirildi.
Tadbir yakunida O‘zbekiston Prezidentining ushbu sohaga doir qarorlarida ko‘rsatilgan topshiriqlarning to‘liq va qat’iy bajarilishini ta’minlashga qaratilgan qo‘shimcha vazifalar belgilab berildi.
Izoh (0)