“O‘zbekkonsert” davlat muassasasi huzuridagi qo‘shiqlar va ularga ishlangan videokliplar saviyasini baholash Badiiy kengashining yig‘ilishida Farhod Saidovning “Jimir-jimir” nomli qo‘shig‘i matni saviyasi past bo‘lganligi bois rad etilgan edi.
Ushbu xonandaga qo‘shiq va unga ishlangan videoklipdagi matnni shoirlarga ko‘rsatib qayta to‘g‘rilash, videoklip ssenariysining g‘oyaviy-badiiy darajasiga alohida e’tibor qaratishi lozimligi ta’kidlanib, videoklipni Badiiy Kengashga qayta topshirilishi borasida tavsiya etilgan edi.
Farhod Saidov jurnalist Feruz Muhammadga bergan intervyusida bu so‘zlar xalq og‘zaki ijodidan olinganligi hamda xalq og‘zaki ijodini saviyasiz deyishga hech kimning haqqi yo‘qligi haqida gapirib berdi.
Badiiy kengash a’zolari kimlardan iborat ekanligini bilmayman. Bu holat yuzasidan bir misol keltirmoqchiman. XI asrda yashab o‘tgan sharq donishmandi Kaykovusning “Qobusnoma” asaridagi hofiz va musiqachilarga bag‘ishlangan bobida “Hamma vaqt og‘ir yo‘llarni chalaverma va hamma vaqt yengil yo‘llarni ham chalaverma, chunki barcha yo‘lni bir xilda chalmaslik kerak, negaki odamlarning hammasi bir xilda emas, tabiatlari ham bir-biriga muvofiq emas, xalq xilma-xildir”, degan. Demak yengilroq ham, og‘irroq ham aytish kerak.Qo‘ling qo‘limga tegsa jimir-jimir qiladi,
Isming aytsam yurakka qimir-qimir qiladi.
Bu falsafa-ku, demak shunchalik seni yaxshi ko‘ramanki, shunchalik men uchun ahamiyatlisanki, mabodo qo‘ling qo‘limga tegib ketsa, buni butun badanim ham his qiladi. Ismingni aytsam yuragim qinidan chiqib ketguday bo‘ladi, deyilmoqda. Bu bizning xalq og‘zaki ijodimizdan olingan. Buni noto‘g‘ri, saviyasi past degan odam bizning merosimizga qarshilik qilgan bo‘ladi. Xalq og‘zaki ijodini saviyasi past deyishga kimning haqqi bor, bu so‘zlar 100-150 yillardan buyon kelayotgan folklordir. Qani saviyasi pastlik, badiiy kengashda kim o‘tiribdi o‘zi, kim buni saviyasi past deb aytmoqda.
Hay-hay go‘zalim, buncha tamanno qilasan,
Aqlimni olib oshiq-u shaydo qilasan.
Goh qoshni qoqib, ko‘zlarni suzib,
Bir lahzada yuz fitnani paydo qilasan.
Bu, menimcha, saviya jihatidan o‘sha aytilayotgan qo‘shiqlarning yuztalariga to‘g‘ri kelsa kerak. “Qaddimni bu qoshingiz egib yo qilasiz”, qaddimni bukyapsiz, deyilgan. “Man g‘am chekaman, siz nega yallo qilasiz”, man azoblangan sayin, siz mazza qilasiz deyilmoqda.
Shu so‘zlarning saviyasi past denglar, men qo‘limni ko‘taraman, bo‘ldi, boshqa gapim yo‘q.
Farhod Saidov, xonanda
Izoh (0)