Farhod Saidov hamda Sitora Farmonova saviyasi past qo‘shig‘i uchun O‘zbekkonsert badiiy kengashi tomonidan tanqid qilindi

“O‘zbekkonsert” davlat muassasasi qoshida qo‘shiqlar va ularga ishlangan videokliplar saviyasini baholash Badiiy kengashining navbatdagi yig‘ilishi bo‘lib o‘tdi. Bu haqda “O‘zbekkonsert” davlat muasassasi matbuot xizmati ma’lum qildi.

Saviyasiz, qo‘shiq matnida ma’no-mazmun bo‘lmagan, videokliplari milliylikka zid bo‘lgan qo‘shiqlarni nazoratga olish maqsadida “O‘zbekkonsert” davlat muassasasi qoshida qo‘shiqlar va ularga ishlangan videokliplar saviyasini baholash Badiiy kengashi o‘z ish faoliyatini olib bormoqda.

20-aprel kuni Badiiy kengashning navbatdagi yig‘ilishi bo‘lib o‘tdi. Kengashda beshta xonandaning qo‘shiqlariga tasvirga olgan videokliplari ko‘rib chiqildi. Ulardan Elmurod Sobirjonov “Sevdim”, Bexruz Toxirov “Keling, dema”, Sardor Bekmurodov “Bolaga kitob bering” deb nomlangan xonandalar qo‘shiqlarga tasvirga olingan videokliplarni OAV orqali efirga uzatishga tavsiya berildi.

Farhod Saidovning “Jimir-jimir” hamda Sitora Farmonovaning “Chamanda gul” deb nomlangan qo‘shiqlarining matni saviyasi past bo‘lganligi bois, rad etildi. Ushbu xonandalarga qo‘shiqlar va ularga ishlangan videokliplardagi qo‘shiq matnini shoirlarga ko‘rsatib qayta to‘g‘rilash, videoklip dasturi (ssenariysi)ning g‘oyaviy-badiiy darajasiga alohida e’tibor qaratishi lozimligi ta’kidlanib, ushbu videokliplarni Badiiy Kengashga qayta topshirilishi borasida tavsiya etildi.