Beeline Uzbekistan interkonnekt (ikki operator tarmoqlari o‘rtasidagi aloqa) stavkasi ishi bo‘yicha quyi sud qarorini qayta ko‘rib chiqishni talab qilgan UMS kompaniyasiga apellyatsiyani boy berdi. Sud davlat operatorining shikoyatini qanoatlantirdi. Bu haqda Sputnik ma’lum qildi.
Toshkent tumanlararo iqtisodiy sudi mart oyi o‘rtalarida UMS da’vosini qisman qanoatlantirib, ikki operator o‘zaro hisob-kitoblarida interkonnekt stavkasini 42 so‘mdan 5 tiyingacha pasaytirish haqida qaror chiqardi. Shu bilan birga, sud amaldagi shartnomani qayta ko‘rib chiqish haqidagi talabni rad etdi va yangi narxning qaror kuchga kirgan kundan amalda bo‘lishini belgiladi.
Bunga javoban UMS apellyatsiya berdi va yangi stavka 2017-yil 1-sentabrdan amalda bo‘lishini talab qildi.
Yuqori sud instansiyasi UMS tomonini oldi: shartnomaning interkonnekt qiymati bo‘yicha shartlarining o‘zgarishi tumanlararo sud qarori kuchga kirgan paytdan emas, balki davlat operatori talab qilganidek, o‘tgan yildan joriy etiladi. Agar u 2018-yil aprelidan joriy etilganida, davlat operatori Beeline’ga 16,3 milliard so‘m debitor qardorligini to‘lab berishi kerak bo‘lardi. Endi Toshkent shahar iqtisodiy sudining yangi qarori bilan UMS buni to‘lamasa ham bo‘ladi.
“Bu shu yil hisobidan ikkinchi sud instansiyasi oldinroq Beeline foydasiga davlat organi yoki davlat operatoriga qarshi qabul qilingan birinchi instansiya sudining qarorini ikkinchi marotaba bekor qilinishi. Bu raqobat muhiti uchun maqbul emas, jahon tajribasi va aytilayotgan investorlar huquqlari himoyasiga ham butkul zid. Afsuski, davlat kompaniyalarining manfaatlari xususiy kompaniyalarning qonuniy huquqlaridan ustun turishi yana bir bor tasdiqlandi.
UMS uchun misli ko‘rilmagan narsalarga imkon berilmoqda — amaldagi shartnomani oldingi sana bilan qayta ko‘rib chiqish, to‘lovlarni 800 barobardan ko‘proqqa qisqartirish. To‘g‘ri, bu davlat operatorining mablag‘larini tejaydi, biroq davlat budjeti soliq to‘lovlarining salmoqli qismini yo‘qotadi. Tarmoq yetakchisiga bunday iqtisodiy bosim bozor jozibadorligini oshirishga xizmat qilmaydi”, — deya sud qaroriga izoh berdi Beeline Uzbekistan bosh direktori Dmitriy Shukov.
Eslatib o‘tamiz, oldinroq Beeline Uzbekistan Aloqa, axborot texnologiyalari va telekommunikatsiyalar sohasini nazorat qilish davlat inspeksiyasi tomonidan berilgan da’voga ko‘ra, 26,9 milliard so‘m (3,3 million dollar) jarima to‘lagandi.
Izoh (0)