2-may kuni MTRK Media-markazi binosida Xalqaro press-klubning navbatdagi sessiyasi bo‘lib o‘tdi. Sessiyada O‘zbekiston Respublikasi Prezidentining “Fuqarolarni ijtimoiy qo‘llab-quvvatlash bo‘yicha qo‘shimcha chora-tadbirlar hamda o‘zboshimchalik bilan qurilgan turar joylarga nisbatan mulk huquqini e’tirof etish bo‘yicha bir martalik umumdavlat aksiyasini o‘tkazish to‘g‘risida”gi Farmoni muhokama qilindi.
“Davyergeodezkadastr” qo‘mitasi bo‘lim boshlig‘i Mirvosil Agzamov “Daryo” muxbirining savoliga javob berar ekan, ko‘p qavatli uylarning birinchi qavatida noqonuniy tarzda o‘zlashtirilgan yerlarda barpo etilgan qurilmalarga mulk huquqi e’tirof etilmasligini ma’lum qildi:
“Farmon loyihasida ko‘p qavatli uylarning birinchi qavatidagi noqonuniy qurilmalarga nisbatan mulk huquqi e’tirof etilishi ko‘zda tutilmagan. Hujjat ko‘p qavatli uylarning birinchi qavatida qurib olingan uylarga nisbatan tatbiq etilmaydi, u faqat yakka tartibda uy-joy qurish uchun mo‘ljallangan yerlarga nisbatan amal qiladi”.
Qayd etilishicha, O‘zbekiston Respublikasi Uy-joy kodeksiga ko‘ra, ko‘p qavatli uylarning birinchi qavatidagi umumiy foydalanishda bo‘lgan yerlardagi noqonuniy qurilmalarga hech qanday tartibda mulk huquqi berilmaydi.
Izoh (0)