O‘zbekistonda sudlar faoliyatiga videokonferensaloqa rejimida ishlarni ko‘rish amaliyoti keng joriy etilmoqda. Bu haqda O‘zA xabar berdi.
Bu tizimning mohiyati shundaki, sud majlisiga boshqa hududda joylashgan ishtirokchilarning bevosita kelishi shart emas. Faqat ular o‘zlari yashaydigan joydagi sud binosiga keladi. Ikki hududda, masalan, Toshkent va Buxoro shaharlaridagi sud binolariga o‘rnatilgan videokonferensaloqa tizimi orqali tomonlar muloqotga kirishish imkoniga ega bo‘ladi. Bu ortiqcha vaqt yo‘qotish, sarf-xarajat qilishning oldini olmoqda.
Videokonferensaloqa tizimi ayni paytda jinoyat ishlari bo‘yicha viloyatlar va ularga tenglashtirilgan sudlarda joriy etilgan. 55 sud majlisi ushbu tizim orqali ko‘rib chiqildi. 249 nafar sud ishtirokchisi o‘zlari joylashgan hududlardan chiqmagan holda sud jarayonida qatnashdi.
Misol uchun, fuqaro K. Hamidov Jinoyat ishlari bo‘yicha Samarqand viloyati sudining hukmi bilan Jinoyat kodeksining 159, 244-moddalarida nazarda tutilgan jinoyatlarni sodir etishda ayblanib, Jinoyat kodeksining 59-moddasi tartibida 10 yilga ozodlikdan mahrum qilingan.
Uning himoyachisi X. Shomurodova mahkumga nisbatan og‘ir jazo tayinlangani, sudlanganning yashash joyidagi mahalla fuqarolar yig‘ini faollari ham unga tayinlangan jazoni yengillashtirish masalasida iltimosnoma berganligi to‘g‘risida Oliy sudga nazorat tartibida shikoyat bilan murojaat qilgan.
Mazkur murojaatda ayni paytda mahkum Navoiy viloyatidagi jazoni ijro etish muassasasida ekani, uning yaqinlari Samarqand viloyatida istiqomat qilishini hisobga olib, sud jarayonini videokonferensaloqa orqali ko‘rib chiqishni so‘ragan.
Shu sababli Oliy sud jinoyat ishlari bo‘yicha sudlov hay’ati advokat murojaati yuzasidan belgilangan sud majlisini uch tomonlama videokonferensaloqa tizimi orqali ko‘rib chiqdi. Ya’ni sud jarayoni Toshkent, Samarqand va Navoiydagi sud binolarida tashkil etildi.
Jinoyat ishlari bo‘yicha Samarqand viloyati sudi binosida himoyachi X. Shomurodova, K. Hamidovning oila a’zolari hamda u istiqomat qilgan mahalla faollari, Navoiy viloyati sudi binosida mahkum K. Hamidov ishtirok etdi.
Sud majlisida K. Hamidov aybiga to‘liq iqrorligi, qilmishidan chin ko‘ngildan pushaymonligi, 2-guruh nogironi ekanligi, muqaddam sudlanmaganligi, jinoyatdagi ishtirokchilik darajasi, oilaviy ahvoli, olti nafar farzandi borligi sababli yengillik so‘radi.
Shuningdek, u yashagan Urgut tumani “Quyi Algar” mahalla fuqarolar yig‘ini raisi va boshqa faollar K. Hamidov tuzalish yo‘liga o‘tgani, uning yoshini, oilaviy ahvolini, birinchi marta sudlanishini e’tiborga olib, unga tayinlangan jazoni yengillashtirishni so‘radi.
Oliy sud jinoyat ishlari bo‘yicha sudlov hay’ati jazoni yengillashtiruvchi holatlarni e’tiborga olib, K. Hamidovga nisbatan chiqarilgan sud hukmini o‘zgartirishni lozim, deb topdi. Mahkumga tayinlangan 10 yilga ozodlikdan mahrum qilish jazosini Jinoyat kodeksining 57-moddasi qo‘llangan holda 4 yil ozodlikdan mahrum qilish jazosiga kamaytirish haqida sud qarori qabul qilindi.
Avval mana shunday ishni sudda ko‘rib chiqish uchun yuqorida tilga olingan shaxslar, mahkumning Toshkent shahriga kelib-ketishi talab qilinardi. Mahkum aybidan qanchalik pushaymon bo‘lmasin, jazo muddati qisqarishi ham biroz qiyin masala edi. Shu jihatdan bugun sud tizimidagi islohotlar, joriy etilayotgan zamonaviy imkoniyatlar qanchalik samara berayotganini ko‘rish mumkin.
Izoh (0)