Chelyabinsk viloyati Varnenskiy tuman sudi Rossiyaga noqonuniy migratsiyani tashkillashtirish bilan shug‘ullangan Qozog‘iston va O‘zbekistonning ikki nafar fuqarosini 2 va 3 yilga koloniyaga mahkum etdi. Bu haqda Sputnik xabar bermoqda.
“Ular RF JK 322-modda ikkinchi qismi “a” bandida ko‘rsatilgan jinoyatlarni sodir etganlikda aybdor deb topilgan. Sud tomonidan sheriklarga umumiy rejimdagi axloq tuzatish koloniyasida jazoni o‘tash ko‘rinishida 2 va 3 yillik ozodlikdan mahrum etish jazosi tayinlangan”, — deb xabar qilmoqda Rossiya Bosh prokuraturasi matbuot xizmati.
Tergov ma’lumotlariga ko‘ra, sheriklar 2016—2017-yillarda pul evaziga Rossiyaga kirishi taqiqlangan O‘zbekiston va Qirg‘izistonning to‘qqiz nafar fuqarosiga Rossiya Federatsiyasiga noqonuniy kirib kelishni tashkillashtirib bergan.
Ayblanuvchilar Rossiyaga noqonuniy kirib borishni xohlovchilarni topgan va ularni Qozog‘iston chegarasiga olib kelgan. U yerda noqonuniy migrantlar kesib o‘tish joyi va qoidalari haqida tegishli ko‘rsatmalarni olgan, shuningdek, maxfiylik va Rossiya hududiga kirib borgandan keyingi harakatlari haqida ogohlantirilgan. Shundan so‘ng ular Rossiyaning Chelyabinsk viloyatiga olib o‘tilgan.
Ko‘rsatilgan xizmatlar uchun noqonuniy migratsiya tarafdorlari yovuz niyatli shaxslarga 300 ming rubldan ortiq mablag‘ to‘lagan.
Prokuratura xabariga ko‘ra, noqonuniy odam tashuvchilar faoliyati o‘tgan yilning may oyida fosh qilingan.
Izoh (0)