Челябинск вилояти Варненский туман суди Россияга ноқонуний миграцияни ташкиллаштириш билан шуғулланган Қозоғистон ва Ўзбекистоннинг икки нафар фуқаросини 2 ва 3 йилга колонияга маҳкум этди. Бу ҳақда Sputnik хабар бермоқда.
«Улар РФ ЖК 322-модда иккинчи қисми «а» бандида кўрсатилган жиноятларни содир этганликда айбдор деб топилган. Суд томонидан шерикларга умумий режимдаги ахлоқ тузатиш колониясида жазони ўташ кўринишида 2 ва 3 йиллик озодликдан маҳрум этиш жазоси тайинланган», — деб хабар қилмоқда Россия Бош прокуратураси матбуот хизмати.
Тергов маълумотларига кўра, шериклар 2016—2017 йилларда пул эвазига Россияга кириши тақиқланган Ўзбекистон ва Қирғизистоннинг тўққиз нафар фуқаросига Россия Федерациясига ноқонуний кириб келишни ташкиллаштириб берган.
Айбланувчилар Россияга ноқонуний кириб боришни хоҳловчиларни топган ва уларни Қозоғистон чегарасига олиб келган. У ерда ноқонуний мигрантлар кесиб ўтиш жойи ва қоидалари ҳақида тегишли кўрсатмаларни олган, шунингдек, махфийлик ва Россия ҳудудига кириб боргандан кейинги ҳаракатлари ҳақида огоҳлантирилган. Шундан сўнг улар Россиянинг Челябинск вилоятига олиб ўтилган.
Кўрсатилган хизматлар учун ноқонуний миграция тарафдорлари ёвуз ниятли шахсларга 300 минг рублдан ортиқ маблағ тўлаган.
Прокуратура хабарига кўра, ноқонуний одам ташувчилар фаолияти ўтган йилнинг май ойида фош қилинган.