O‘zbekiston Investitsiyalar bo‘yicha davlat qo‘mitasi “Markaziy Osiyo, Kavkaz va Rossiya mintaqasidagi eng yaxshi investitsion loyiha” yo‘nalishida mukofotni qo‘lga kiritdi. Bu haqda Prezident matbuot kotibi Komil Allamjonov ma’lum qildi.
2018-yil 9-aprel kuni Birlashgan Arab Amirliklarining Dubay shahrida an’anaviy Annual Investment Meeting (AIM) xalqaro investitsiyaviy forumi doirasida AIM 2018 Investment awards mukofotlarini topshirish marosimi bo‘ldi.
“2017-yilda Markaziy Osiyo, Kavkaz va Rossiya mintaqasidagi eng yaxshi investitsion loyiha” nominatsiyasida O‘zbekiston Respublikasi Investitsiyalar bo‘yicha davlat qo‘mitasi g‘olib bo‘ldi.
“Bu Prezidentimizning investitsiyaviy muhitni yaxshilash borasidagi islohotlarining xalqaro e’tirofi va bahosidir. Barcha yurtdoshlarimizni tabriklayman va yangi muvaffaqiyatlar tilayman!” — deb yozdi Komil Allamjonov.