Chevrolet kompaniyasi yangilangan Camaro kupesi va kabrioletini rasman taqdim etdi, deb yozadi “Motor”. Modellar yangi qiyofaga, shuningdek, bir qator yangi uskunalarga ega bo‘ldi.
Restaylingdan so‘ng kupe va kabriolet kuzovining old qismi deyarli butunlay o‘zgardi. Radiator panjarasi va bamper boshqacha qiyofaga kirdi, optika o‘zgardi, shuningdek, kapot ham almashdi. Orqa tomonda boshqa bamper va chiroqlar paydo bo‘ldi. Bundan tashqari, RS va SS modifikatsiyalari uchun diametri 20 dyuymli yangi g‘ildiraklar ham joriy etildi.
461 ot kuchiga teng 6,2 litrli V8 motorini ko‘zda tutuvchi SS modifikatsiyasidagi kupe va kabriolet avvalgi sakkiz pog‘ona o‘rniga o‘n pog‘onali avtomatik uzatish qutisiga ega bo‘ldi.
Yangilanishdan keyin Camaro modifikatsiyalari lineykasi Turbo 1LE versiyasi bilan to‘ldirildi. U 278 ot kuchiga teng ikki litrli turbomotor bilan jihozlangan. Bunday komplektatsiya qo‘shimcha ravishda Brembo tormozlari, zamsh qoplangan rul chambaragi, shuningdek, boshqaruvchi elektronikaning trekli ish rejimi bilan ta’minlangan.
Izoh (0)