Poytaxt stadionlariga muxlislar qaytmoqda: “Bunyodkor” va “Paxtakor” Superliganing 4-turida eng ko‘p tomoshabin to‘pladi

Futbol bo‘yicha O‘zbekiston Superligasining 4-turida muxlislarni jalb etish bo‘yicha poytaxt stadionlari yetakchi bo‘ldi. Bu haqda PFL xabar berdi.

“Paxtakor” va Farg‘onaganing “Neftchi” jamoalari o‘rtasidagi uchrashuvga 15 100 nafar tomoshabin tashrif buyurdi. Biroq bu son ham “paxtakorchi”larning bu muxlis to‘plash borasida yetakchi bo‘lishiga biroz kamlik qildi. Sababi, “Bunyodkor” va “Buxoro” jamoalari o‘rtasidagi o‘yinni 15 421 nafar ishqiboz bevosita stadionning o‘zida tomosha qilgandi.

Poytaxt stadionlari uchun bu kabi ko‘rsatkich anchadan buyon qayd etilmayotgan edi. 4-turda stadionlarga jami 74 909 nafar tomoshabin tashrif buyurdi.

Ammo bu 3-turdagi muxlislar tashrifiga nisbatan kamdir. Hozircha O‘zbekiston Superligasining 3-turi muxlislar tashrifi borasida eng yaxshisi bo‘lib turibdi. O‘tgan turni jami 85 209 nafar muxlis kuzatib borgan.

Mavsumdagi ilk turni ko‘rish uchun stadionlarga 80 570 ishqiboz tashrif buyurgandi. Bunda eng ko‘p ishqiboz “Neftchi” — “Nasaf” o‘yiniga keldi — 19 632.

2-turda esa tashriflar soni kamaygan — 57 876. Biroq 1 ta o‘yin borasidagi ko‘rsatkich yaxshilandi hamda “Bunyodkor” va “Paxtakor” klublari o‘rtasidagi Toshkent derbisini 20 168 muxlis stadiondan kuzatdi. Bu ko‘rsatkich mazkur ikki klubning o‘zaro o‘yinlardagi rekord natijasi bo‘ldi. Bungacha 2008-yilgi mavsumdagi Toshkent derbisini 18 mingdan ko‘proq ishqiboz kuzatib borgandi.

3-turga kelib Superliganing rekordi Namanganda yangilandi. “Navbahor” hamda “Lokomotiv” jamoalari ishtirokidagi o‘yinni 25 300 ishqiboz stadiondan kuzatdi. Shu kuni ayrim sektorlarga chiptalar 30 mingdan sotilgan bo‘lsa-da, stadion kassalarida birorta ham chipta qolmadi. Shuningdek, Namangandagi stadionga kirish istagida bo‘lgan yana minglab muxlislar tribunalardan joy topa olmay, “Navbahor”ni maydon tashqarisida qo‘llab turdi.