Andijon viloyatining Jalaquduq tumanidagi xonadonlarning birida 29-mart kuni yuz bergan yong‘in oqibatida 23 yoshli yigit halok bo‘ldi. O‘zbekiston IIV Jamoatchilik va ommaviy axborot vositalari bilan aloqalar boshqarmasi xabar bermoqda.
Xabar berishlaricha, 29-mart kuni soat 11:20 atrofida Andijon viloyatining Jalaquduq tumani “Ko‘tarma” mahalla fuqarolar yig‘inidagi xonadonlarning birida 1995-yilda tug‘ilgan fuqaro uyida mast holda sigareta chekib, uxlab qolgan.
Oqibatda sigareta ko‘rpaga tushib, yong‘in sodir bo‘lgan. Ko‘rilgan choralar natijasida yong‘in o‘chirilgan.
“Yong‘in oqibatida uydagi ko‘rpa-to‘shaklari yonib, zarar ko‘rgan va yong‘in o‘chirish vaqtida yigitning kuygan holdagi jasadi topilgan”, — deyiladi vazirlik axborotida.
Avvalroq Namangan viloyatining Norin tumanidagi xonadonlarning birida qo‘lbola isitish pechidan chiqqan yong‘in oqibatida nafaqaxo‘r fuqaro halok bo‘lgani haqida xabar berilgan edi.
Izoh (0)