Qoraqalpog‘iston Respublikasi Taxtako‘pir, Qo‘ng‘irot va Qonliko‘l tumanlarida chorvachilik tarmoqlarini yanada rivojlantirish, chorvachilik mahsulotlarini yetishtirishni keskin oshirish chora-tadbirlari to‘g‘risidagi hukumat qarori qabul qilindi. Bu haqda Adliya vazirligining Telegram’dagi kanalida ma’lum qilindi.
Qarorga asosan Taxtako‘pir va Qonliko‘l tumanlarida chorvachilik tarmoqlarini rivojlantirish, shuningdek, Taxtako‘pir tumanida chorvachilik ozuqa bazasini mustahkamlash maqsadida 2018-yilda 800 gektar paxta maydoni qisqartirilib, o‘rniga qishloq xo‘jaligi hayvonlari uchun ozuqa ekinlarini joylashtiriladi, kelgusi yillarda bosqichma-bosqich paxta maydonlari qisqartirib boriladi.
Taxtako‘pir va Qo‘ng‘irot tumanlarini 2018-yildan boshlab to‘liq chorvachilikka ixtisoslashtirilgan tumanlarga aylantirish choralarini ko‘riladi.
Taxtako‘pir, Qo‘ng‘irot va Qonliko‘l tumanlarida amalga oshiriladigan mazkur loyihalarda mahalliy tadbirkorlar bilan bir qatorda Andijon, Farg‘ona va Namangan viloyatlaridan ham tadbirkorlar ishtirok etadi.
Qoraqalpog‘iston Respublikasi Vazirlar kengashiga Taxtako‘pir tumanidagi yaylovlarda 2018—2019-yillarda 10 ming bosh mol parvarishlashga ixtisoslashtirilgan fermer xo‘jaliklari tashkil etish, Toshkent shahar hokimligiga tumanda yetishtirilgan go‘sht mahsulotlarini xarid qilish, saqlash va shahar aholisiga yetkazib berishga ixtisoslashtirilgan, zamonaviy qushxona va muzlatgichga ega bo‘lgan korxona tashkil etish vazifasi yuklanmoqda.
Izoh (0)