O‘zbekiston Sog‘liqni saqlash vaziri buyrug‘i bilan tizimdagi boshqaruv organlari rahbarlarining malakasi hamda kasbiy tayyorgarligi darajasini yanada oshirish maqsadida birinchi marta chuqurlashtirilgan haftalik o‘quv kurslari tashkil etildi.
Unda Qoraqalpog‘iston Respublikasi sog‘liqni saqlash vaziri, Toshkent shahar va viloyatlar sog‘liqni saqlash boshqarma boshliqlari, tuman (shahar) tibbiyot birlashmalarining mas’ullari ishtirok etmoqda, deya xabar bermoqda vazirlik axborot xizmati.
Malaka oshirish kurslari uch bosqichda tashkil etilib, sog‘liqni saqlash tizimining barcha bo‘g‘inidagi rahbar xodimlarini qamrab olish belgilangan. Rejaga ko‘ra, ushbu kurslarda 700 nafardan ortiq rahbarlar malakasi oshiriladi.
Mashg‘ulotlarda 2017-yilda sog‘liqni saqlash tizimini takomillashtirish bo‘yicha qabul qilingan Prezident farmon va qarorlari, Vazirlar Mahkamasi qarorlari sharhi, ularning mazmun-mohiyati muhokama qilindi.
O‘quv kurslarida birlamchi tibbiy-sanitariya yordamini tashkil etish, onalik va bolalik muhofazasi, ixtisoslashtirilgan tibbiy yordam va xususiy tibbiyot muassasalari ishini tashkil etish bo‘yicha vazirlik mutasaddi xodimlari ma’ruzasi tinglandi.
O‘quv kurslari davomida korrupsiyaning oldini olish, dori vositalari, tibbiy texnika va ijtimoiy dorilarga bo‘lgan ehtiyojni to‘g‘ri aniqlash, murojaatlar bilan ishlash tartibini yanada takomillashtirish kabi mavzularda ma’ruza va taqdimotlar qilinmoqda.
Ishtirokchilarga har bir rahbar xodim, avvalo, xalq manfaati va aholi roziligi yo‘lida xizmat qilishi, buning uchun xonada o‘tirib emas, mahallama-mahalla, xonadonma-xonadon yurib xalq bilan muloqot qilishi lozimligi ta’kidlandi.
Shuningdek, tanqidiy tahlil, qat’iy tartib-intizom va shaxsiy javobgarlik bugungi kun rahbarining kundalik qoidasi bo‘lishi kerakligi tushuntirilmoqda.
Izoh (0)