Andijon viloyati Shahrixon tumanidagi “Universalagrolyuks” fermer xo‘jaligi issiqxonasida pomidordan yiliga uch marta hosil olish odat tusiga kirgan. Endi esa bu ko‘rsatkich to‘rt martaga yetkazildi, deb xabar beradi “Xalq so‘zi”.
“Biz gidroponika usulini qo‘llashga kirishdik. Unga ko‘ra, o‘simlik tuproqda emas, balki suvda undiriladi. Yanada yuqori natijaga erishish uchun pomidor urug‘ini kokosning qurigan poyasi joylashtirilgan sellofan idishga ekdik. Belgilangan agrotexnika qoidalariga binoan, ekinni o‘z vaqtida suv va boshqa ozuqalar bilan ta’minlab turamiz”, — deydi xo‘jalik rahbari Sanjarbek Rahimov.
Fermer xo‘jaligida 1 gektar maydondan iborat issiqxona tashkil etildi. Jahon banki tomonidan 500 ming AQSh dollari miqdoridagi moliyaviy ko‘mak yo‘naltirilgan yangi loyihani amalga oshirish uchun Janubiy Koreyadagi “Mayson plakon” kompaniyasining innovatsion texnologiyalaridan foydalanilmoqda. Yetishtirilgan hosil xo‘jalikning o‘zida qadoqlanib, eksport qilinadi.
Izoh (0)