26-fevral kuni O‘zbekiston bo‘ylab yog‘ingarchilik kuzatildi. Bu hududlarda ba’zi noqulayliklarga sabab bo‘ldi. Xususan, Jizzax viloyati Do‘stlik shahrining ayrim ko‘chalari yurish uchun yaroqsiz ahvolga kelib qolgan.
“Har yomg‘irdan keyin biz piyodalar uchun murakkab jarayon yuz beradi — yo‘lda yurish noqulaylashadi. Bu jarayon sizga ham tanishmi?”, — deb yozgan “Xalq bilan muloqot” guruhida Do‘stlikdagi vaziyat suratlarini e’lon qilgan foydalanuvchi.
Do‘stlikdagi vaziyat bilan yaqindan tanish bloger Sanjar Saidning ta’kidlashicha, bu joylarni “shahar deyishga til ham bormaydi”.
“Nechta hokim kelsa ham, vaziyat o‘zgarmaydi. Ular ish vaqtida, ish joyida nima bilan mashg‘ul, hayronman. O‘tgan yili ichki yo‘llarni yaxshilash dasturi doirasida 7 kilometr yo‘l ta’mirlanishi kerak edi, lekin o‘zgarish sezilmadi. Qachon biz ham risoladagidek yo‘llardan yuramiz? Ahvolimizga maymunlar yig‘lab o‘tiribdi-ku!”, — deb yozadi bloger.
Qayd etish joiz, fotoxabar ostida muhokamaga kirishgan foydalanuvchilar orasida “shu yerda yashayotgan odamlarning o‘zi pul yig‘ib, yo‘lni tuzatib olsa bo‘ladi-ku, qachon hokimlik qiladi, deb o‘tirmasdan” qabilida fikr bildirganlar ham bor.
Izoh (0)