“Inson va qonun” gazetasida to‘y marosimlari o‘tkazishning “Olmaliq shahar tajribasi”dan foydalanish haqida fikr yuritildi.
O‘zbekiston Prezidenti Shavkat Mirziyoyev 2017-yil 11-avgustda Toshkent viloyatining Olmaliq shahrida bo‘lgan tashrifi chog‘ida to‘y marosimlarini o‘tkazishning “Olmaliq shahar tajribasi”ni taqdim etgan edi. Shaharning “Bobur” mahallasi hududida yangi FHDYo binosi qad rostlashi va bu bino markazlashgan darcha bo‘lishini aytib, uning vazifalarini quyidagicha belgilagan edi: “Endi FHDYo bo‘limi mudirasi faqatgina ro‘yxatga olib yurmaydi, bu bino ichida ham 200 kishiga mo‘ljallangan to‘y qiladigan joy bo‘ladi. To‘yda necha nafar xonanda bo‘ladi, qancha ichimlik bo‘ladi, qancha xarajat qilinadi — nazorat qiladi”. Prezident ko‘rsatmasi bo‘yicha FHDYo mudirasi to‘y egalariga marosimni o‘tkazish borasida tushuntirishlar berishi, agar mazkur shartlarga ular ko‘nmasa, o‘z tumani yoki shaharida to‘y qilishga ruxsat bermasligi kerak edi. Xo‘sh, bugun amalda bu ishlar qanday borayapti ekan? Odamlarimiz ixchamroq to‘y qilish yo‘liga o‘tdimi? To‘y oqshomidagi yevropacha betayin kuy-qo‘shiqlarga, dabdabali rasm-rusumlarga barham berildimi?
Ochig‘i, to‘y qilamiz, xursandchilik kunimizni xotiralarga muhrlaymiz deb mayda ikir-chikirlarni, har biri falon so‘m bilan o‘lchanadigan odatu qiliqlarni shu qadar ko‘paytirib yuboribmizki, bunga hatto mamlakat rahbarining o‘zi aralashishga majbur bo‘ldi. Nahotki, o‘zimizga bog‘liq bo‘lgan, ma’naviyatimiz, saviyamizning qay darajada ekanligini belgilaydigan arzimas, mazmunsiz o‘yinlardan voz kechishimiz shunchalik mushkul bo‘lsa?! Prezidentning jon kuydirishi ham faqat biz uchun, yaxshi yashashimiz, bir kunlik marosim deb mablag‘ni havoga sovurmay, har kunlik turmush tarzimizni farovon qilish uchun emasmi? Buning tag zamirida esa ma’naviyatimiz muammolari ham ko‘ndalang turibdi. Mamlakat rahbarining “Bunday to‘ylarda 2 ta kitob, 4 ta she’r o‘qiladi”, degan da’vati tagida nima yotibdi? To‘ylarda diskotekaga tushish zamonning zayli, kitob yo she’r o‘qiganda esa peshona tirishtirib o‘tirish tafakkurning qashshoqligidan degani emasmi? Vaholanki, oqshom chog‘i hamma narsani unutib, o‘z hissiyotlariga erk bergan kishi videotasmada o‘zini ko‘rgach, uyatdan jiqqa terga botishi ham bor gap-ku! O‘sha paytda uning videotasmadan o‘zi tushgan tasvirlarni o‘chirib tashlashni qanchalik istashini tasavvur etish mumkin. Biroq to‘y-tomoshaga yig‘ilgan son-sanoqsiz odamlar xotirasidan-chi, tasvirlarni o‘chirishning aslo imkoni yo‘q. Zero, xalq ta’biri bilan aytganda, “To‘yga kimdir yegani keladi, kimdir tomoshaga”.To‘y-hashamda o‘sha millatning urf-odati, hayot tarzi, ma’naviy dunyoqarashi ochiq-oydin ko‘rinib qolishi turgan gap. Unda milliy kuy-qo‘shiqlar yangrashi, sadoqat, mehr-muhabbat, burch va matonat ifoda etilgan she’rlarning jaranglashi esa qanday xushkayfiyat bag‘ishlagan, ruhiyatni poklagan bo‘lar edi. Dabdurustdan so‘z berilganda ikki og‘iz so‘zni juftlab aytolmagan odam qayda-yu, yoshlarga ezgu tilaklarini ikki misra she’r yoyinki biror adabiy asardan ibrat tariqasida parcha keltirib ifodalagan qayda, deysiz. Demakki, Prezident da’vatida ko‘tarilgan masala jiddiy: ma’naviyatni yuksaltirish, ruhiyatni poklash, burchni anglash, oddiylikning hikmatiga yetish, turmushimiz sifatini ko‘tarish, hayotimiz farovonligi, oilalar mustahkamligiga erishish!
Qayd etilishicha, gazeta tahririyati kelgusida to‘ylarda reyd uyushtirib, ushbu masalada qilingan amaliy ishlar natijasini aniqlaydi.
Izoh (0)