«Инсон ва қонун» газетасида тўй маросимлари ўтказишнинг «Олмалиқ шаҳар тажрибаси»дан фойдаланиш ҳақида фикр юритилди.
Ўзбекистон Президенти Шавкат Мирзиёев 2017 йил 11 августда Тошкент вилоятининг Олмалиқ шаҳрида бўлган ташрифи чоғида тўй маросимларини ўтказишнинг «Олмалиқ шаҳар тажрибаси»ни тақдим этган эди. Шаҳарнинг «Бобур» маҳалласи ҳудудида янги ФҲДЁ биноси қад ростлаши ва бу бино марказлашган дарча бўлишини айтиб, унинг вазифаларини қуйидагича белгилаган эди: «Энди ФҲДЁ бўлими мудираси фақатгина рўйхатга олиб юрмайди, бу бино ичида ҳам 200 кишига мўлжалланган тўй қиладиган жой бўлади. Тўйда неча нафар хонанда бўлади, қанча ичимлик бўлади, қанча харажат қилинади — назорат қилади». Президент кўрсатмаси бўйича ФҲДЁ мудираси тўй эгаларига маросимни ўтказиш борасида тушунтиришлар бериши, агар мазкур шартларга улар кўнмаса, ўз тумани ёки шаҳарида тўй қилишга рухсат бермаслиги керак эди. Хўш, бугун амалда бу ишлар қандай бораяпти экан? Одамларимиз ихчамроқ тўй қилиш йўлига ўтдими? Тўй оқшомидаги европача бетайин куй-қўшиқларга, дабдабали расм-русумларга барҳам берилдими?
Очиғи, тўй қиламиз, хурсандчилик кунимизни хотираларга муҳрлаймиз деб майда икир-чикирларни, ҳар бири фалон сўм билан ўлчанадиган одату қилиқларни шу қадар кўпайтириб юборибмизки, бунга ҳатто мамлакат раҳбарининг ўзи аралашишга мажбур бўлди. Наҳотки, ўзимизга боғлиқ бўлган, маънавиятимиз, савиямизнинг қай даражада эканлигини белгилайдиган арзимас, мазмунсиз ўйинлардан воз кечишимиз шунчалик мушкул бўлса?! Президентнинг жон куйдириши ҳам фақат биз учун, яхши яшашимиз, бир кунлик маросим деб маблағни ҳавога совурмай, ҳар кунлик турмуш тарзимизни фаровон қилиш учун эмасми? Бунинг таг замирида эса маънавиятимиз муаммолари ҳам кўндаланг турибди. Мамлакат раҳбарининг «Бундай тўйларда 2 та китоб, 4 та шеър ўқилади», деган даъвати тагида нима ётибди? Тўйларда дискотекага тушиш замоннинг зайли, китоб ё шеър ўқиганда эса пешона тириштириб ўтириш тафаккурнинг қашшоқлигидан дегани эмасми? Ваҳоланки, оқшом чоғи ҳамма нарсани унутиб, ўз ҳиссиётларига эрк берган киши видеотасмада ўзини кўргач, уятдан жиққа терга ботиши ҳам бор гап-ку! Ўша пайтда унинг видеотасмадан ўзи тушган тасвирларни ўчириб ташлашни қанчалик исташини тасаввур этиш мумкин. Бироқ тўй-томошага йиғилган сон-саноқсиз одамлар хотирасидан-чи, тасвирларни ўчиришнинг асло имкони йўқ. Зеро, халқ таъбири билан айтганда, «Тўйга кимдир егани келади, кимдир томошага».Тўй-ҳашамда ўша миллатнинг урф-одати, ҳаёт тарзи, маънавий дунёқараши очиқ-ойдин кўриниб қолиши турган гап. Унда миллий куй-қўшиқлар янграши, садоқат, меҳр-муҳаббат, бурч ва матонат ифода этилган шеърларнинг жаранглаши эса қандай хушкайфият бағишлаган, руҳиятни поклаган бўлар эди. Дабдурустдан сўз берилганда икки оғиз сўзни жуфтлаб айтолмаган одам қайда-ю, ёшларга эзгу тилакларини икки мисра шеър ёйинки бирор адабий асардан ибрат тариқасида парча келтириб ифодалаган қайда, дейсиз. Демакки, Президент даъватида кўтарилган масала жиддий: маънавиятни юксалтириш, руҳиятни поклаш, бурчни англаш, оддийликнинг ҳикматига етиш, турмушимиз сифатини кўтариш, ҳаётимиз фаровонлиги, оилалар мустаҳкамлигига эришиш!
Қайд этилишича, газета таҳририяти келгусида тўйларда рейд уюштириб, ушбу масалада қилинган амалий ишлар натижасини аниқлайди.
Изоҳ (0)