O‘zbekiston boshqa mamlakatlar uchun eng jozibador siyosiy va iqtisodiy hamkorlaridan biriga aylanib bormoqda. Bu haqda Tashqi ishlar vaziri o‘rinbosari G‘ayrat Fozilov Oliy Majlis Senatining 13-yalpi majlisida ma’lum qildi. U parlamentning yuqori palatasida Tashqi ishlar vazirligining 2017-yilgi faoliyati haqidagi hisobot bilan chiqish qildi, deb yozadi “Gazeta.uz”.
“Mamlakatimiz suverenitetini yanada mustahkamlash, O‘zbekiston atrofida xavfsizlik, barqarorlik va ahil qo‘shnichilik makonini yaratish, yurtimizda olib borilayotgan islohotlarni samarali amalga oshirish uchun qulay shart-sharoitlarni shakllantirish, xorijiy hamkorlar bilan savdo-iqtisodiy va sarmoyaviy aloqalarni kengaytirish, chet eldagi fuqarolarimiz huquq va manfaatlarini himoya qilish bo‘yicha muhim natijalarga erishildi”, — dedi G‘ayrat Fozilov.
O‘zbekiston tashqi siyosiy aloqalari sezilarli darajada faollashdi va kengaydi, asosiy xorijiy sheriklar bilan keng qamrovli hamkorlik mustahkamlandi va erishilgan kelishuvlarni amalga oshirishning samarali mexanizmi joriy etildi.
O‘tgan yil davomida 20 dan ortiq oliy darajadagi tashriflar bo‘lib o‘tdi, 60 dan ziyod davlat va xalqaro tuzilmalar rahbarlari bilan uchrashuvlar o‘tkazildi. Xorijiy hamkorlar bilan tashkil etilgan turli darajadagi uchrashuvlar, muzokaralar va tashriflar natijasida 200 dan ortiq xalqaro kelishuvlar hamda 60 mlrd. dollarga teng shartnoma va bitimlar imzolandi.
Hamkorlar bilan erishilgan kelishuvlarni o‘z vaqtida va sifatli amalga oshirishni ta’minlash maqsadida tashqi siyosiy faoliyat uchun mutlaqo yangi va samarali mexanizm — xorijiy sheriklar bilan hamkorlikni rivojlantirish bo‘yicha “yo‘l xaritalari”ni ishlab chiqish va qabul qilish amaliyoti joriy etildi. Mazkur mexanizm belgilangan maqsad va vazifalarga erishishda barcha davlat va xo‘jalik boshqaruvi organlarining sa’y-harakatlarini birlashtirish imkonini yaratib bermoqda. Yil boshidan buyon xorijiy davlatlar va xalqaro tashkilotlar bilan birgalikda 40 dan ortiq “yo‘l xaritalari” qabul qilindi.
Amalga oshirilgan chora-tadbirlar natijasida joriy yilning dastlabki 10 oyi mobaynida O‘zbekistonning chet mamlakatlar bilan tovar ayriboshlash hajmi 16,6% ga o‘sib, 22 mlrd. dollardan oshdi. Rossiya bilan o‘zaro savdo hajmi 18% ga yuqoriladi (4,01 mlrd. doll.), Xitoy bilan 15% ga (4 mlrd. doll.), Qozog‘iston bilan 12,3% ga (1,71 mlrd. doll.), Turkiya bilan 31% ga (1,23 mlrd. doll.), Koreya Respublikasi bilan esa 36% ga (1,1 mlrd. doll.) ortdi.
“O‘zbekiston Markaziy Osiyodagi qo‘shni davlatlar bilan munosabatlarda mutlaqo yangi siyosiy muhitni yaratishga, mintaqadagi siyosiy ishonchni sezilarli darajada oshirishga, hamkorlikning ko‘plab sohalarida yuqori natijalarga erishishga muvaffaq bo‘ldi”, — deya davom etdi G‘ayrat Fozilov.
O‘tgan vaqt mobaynida mintaqa davlatlari rahbarlari bilan 20 dan ziyod uchrashuvlar, oliy darajadagi 10 ta davlat, rasmiy va ishchi tashriflari amalga oshirildi. O‘zbekistonning Markaziy Osiyo yo‘nalishidagi faol siyosati tufayli mintaqada nizo kelib chiqishi ehtimolligini oshiruvchi omillar deyarli bartaraf etildi. Markaziy Osiyoda mintaqaviy hamkorlikni chuqurlashtirish va kengaytirish, do‘stlik va ahil qo‘shnichilik muhitini yaratish g‘oyalari amaliyotga tatbiq etildi.
Mintaqadagi savdo-iqtisodiy, sarmoyaviy, sanoat-kooperatsion, transport-kommunikatsiya va madaniy-gumanitar hamkorlik jadal sur’atlarda rivojlanmoqda, chegaralarni delimitatsiya va demarkatsiya qilish, suvdan oqilona foydalanish masalalari yechimida sezilarli darajada olg‘a siljish kuzatildi.
Afg‘onistonning mintaqaviy iqtisodiy jarayonlarga faol jalb etilishi Markaziy Osiyoning barqaror va xavfsiz rivojlanishi asoslarining mustahkamlanishiga xizmat qiladi.
O‘zbekistonning Mustaqil davlatlar hamdo‘stligi, Shanxay hamkorlik tashkiloti, Islom hamkorlik tashkiloti hamda Yevropa xavfsizlik va hamkorlik tashkiloti doirasidagi ishtiroki faollashdi. O‘zbekiston Hamdo‘stlikning bir qator organlari ishiga qo‘shildi, milliy koordinator lavozimi Bosh vazir o‘rinbosari darajasiga ko‘tarildi. YeXHT Parlament assambleyasi bilan bo‘lgan munosabatlardagi “tanaffus” to‘xtatildi — Oliy Majlis vakillari bu tizim faoliyatiga qo‘shilishdi. Davlatning Iqtisodiy hamkorlik tashkiloti, Parlamentlararo ittifoq, Markaziy Osiyo davlatlari va Ozarbayjon bilan Arab iqtisodiy hamkorlik forumidagi ishtiroki qayta tiklandi.
Xalqaro moliyaviy institutlar bilan hamkorlik muvaffaqiyatli rivojlanmoqda, Yevropa tiklanish va taraqqiyot banki bilan aloqa qayta tiklandi, Yevropa investitsion banki bilan hamkorlik o‘rnatildi.
“O‘zbekiston global va mintaqaviy miqyosidagi muhim masalalar bo‘yicha o‘zining qat’iy va faol pozitsiyasiga ega ekanligini hamda xalqaro jarayonlarda chetdan kuzatib bo‘lib turish niyatida emasligini ko‘rsatdi”, — dedi vazir o‘rinbosari.
Chet eldagi O‘zbekiston fuqarolariga nisbatan munosabat tubdan o‘zgardi, ularning huquq va manfaatlarini himoya qilish bo‘yicha ishlar sezilarli kuchaydi.
O‘ta qisqa muddat ichida xalqaro hamjamiyatning O‘zbekistonga bo‘lgan munosabatini tubdan o‘zgartirishga va mamlakatimizning xalqaro obro‘sini sezilarli darajada mustahkamlashga erishildi.
“O‘zbekiston jamiyatni demokratlashtirish, inson xuquqlarini himoya qilish, qonun ustuvorligini ta’minlash, iqtisodiyotni liberallashtirish va so‘z erkinligini ta’minlashga qaratilgan islohotlarni amalga oshirishga qat’iy kirishgan ishonchli hamkor sifatida o‘z imidjini shakllantirdi. Jahon hamjamiyati tomonidan davlatimiz tashqi siyosatining ochiqligi, konstruktivligi va shiddatliligi alohida e’tirof etilmoqda”, — dedi u.
“O‘zbekiston to‘g‘risida ijobiy axborot muhitini yaratish mamlakatning dunyodagi mavqe’ini kuchaytiradi va investitsion jozibadorligini oshiradi. Ta’kidlash joizki, O‘zbekiston ishonchli tarzda MDH, Osiyo Tinch okeani mintaqasi, Yaqin Sharq, Yevropa va Amerika davlatlarining yaqin siyosiy va iqtisodiy hamkorlaridan biriga aylanib bormoqda”, — deya qo‘shib qo‘ydi vazir o‘rinbosari.
Izoh (0)