Ўзбекистон бошқа мамлакатлар учун энг жозибадор сиёсий ва иқтисодий ҳамкорларидан бирига айланиб бормоқда. Бу ҳақда Ташқи ишлар вазири ўринбосари Ғайрат Фозилов Олий Мажлис Сенатининг 13-ялпи мажлисида маълум қилди. У парламентнинг юқори палатасида Ташқи ишлар вазирлигининг 2017 йилги фаолияти ҳақидаги ҳисобот билан чиқиш қилди, деб ёзади «Газета.uz».
«Мамлакатимиз суверенитетини янада мустаҳкамлаш, Ўзбекистон атрофида хавфсизлик, барқарорлик ва аҳил қўшничилик маконини яратиш, юртимизда олиб борилаётган ислоҳотларни самарали амалга ошириш учун қулай шарт-шароитларни шакллантириш, хорижий ҳамкорлар билан савдо-иқтисодий ва сармоявий алоқаларни кенгайтириш, чет элдаги фуқароларимиз ҳуқуқ ва манфаатларини ҳимоя қилиш бўйича муҳим натижаларга эришилди», — деди Ғайрат Фозилов.
Ўзбекистон ташқи сиёсий алоқалари сезиларли даражада фаоллашди ва кенгайди, асосий хорижий шериклар билан кенг қамровли ҳамкорлик мустаҳкамланди ва эришилган келишувларни амалга оширишнинг самарали механизми жорий этилди.
Ўтган йил давомида 20 дан ортиқ олий даражадаги ташрифлар бўлиб ўтди, 60 дан зиёд давлат ва халқаро тузилмалар раҳбарлари билан учрашувлар ўтказилди. Хорижий ҳамкорлар билан ташкил этилган турли даражадаги учрашувлар, музокаралар ва ташрифлар натижасида 200 дан ортиқ халқаро келишувлар ҳамда 60 млрд. долларга тенг шартнома ва битимлар имзоланди.
Ҳамкорлар билан эришилган келишувларни ўз вақтида ва сифатли амалга оширишни таъминлаш мақсадида ташқи сиёсий фаолият учун мутлақо янги ва самарали механизм — хорижий шериклар билан ҳамкорликни ривожлантириш бўйича «йўл хариталари»ни ишлаб чиқиш ва қабул қилиш амалиёти жорий этилди. Мазкур механизм белгиланган мақсад ва вазифаларга эришишда барча давлат ва хўжалик бошқаруви органларининг саъй-ҳаракатларини бирлаштириш имконини яратиб бермоқда. Йил бошидан буён хорижий давлатлар ва халқаро ташкилотлар билан биргаликда 40 дан ортиқ «йўл хариталари» қабул қилинди.
Амалга оширилган чора-тадбирлар натижасида жорий йилнинг дастлабки 10 ойи мобайнида Ўзбекистоннинг чет мамлакатлар билан товар айрибошлаш ҳажми 16,6% га ўсиб, 22 млрд. доллардан ошди. Россия билан ўзаро савдо ҳажми 18% га юқорилади (4,01 млрд. долл.), Хитой билан 15% га (4 млрд. долл.), Қозоғистон билан 12,3% га (1,71 млрд. долл.), Туркия билан 31% га (1,23 млрд. долл.), Корея Республикаси билан эса 36% га (1,1 млрд. долл.) ортди.
«Ўзбекистон Марказий Осиёдаги қўшни давлатлар билан муносабатларда мутлақо янги сиёсий муҳитни яратишга, минтақадаги сиёсий ишончни сезиларли даражада оширишга, ҳамкорликнинг кўплаб соҳаларида юқори натижаларга эришишга муваффақ бўлди», — дея давом этди Ғайрат Фозилов.
Ўтган вақт мобайнида минтақа давлатлари раҳбарлари билан 20 дан зиёд учрашувлар, олий даражадаги 10 та давлат, расмий ва ишчи ташрифлари амалга оширилди. Ўзбекистоннинг Марказий Осиё йўналишидаги фаол сиёсати туфайли минтақада низо келиб чиқиши эҳтимоллигини оширувчи омиллар деярли бартараф этилди. Марказий Осиёда минтақавий ҳамкорликни чуқурлаштириш ва кенгайтириш, дўстлик ва аҳил қўшничилик муҳитини яратиш ғоялари амалиётга татбиқ этилди.
Минтақадаги савдо-иқтисодий, сармоявий, саноат-кооперацион, транспорт-коммуникация ва маданий-гуманитар ҳамкорлик жадал суръатларда ривожланмоқда, чегараларни делимитация ва демаркация қилиш, сувдан оқилона фойдаланиш масалалари ечимида сезиларли даражада олға силжиш кузатилди.
Афғонистоннинг минтақавий иқтисодий жараёнларга фаол жалб этилиши Марказий Осиёнинг барқарор ва хавфсиз ривожланиши асосларининг мустаҳкамланишига хизмат қилади.
Ўзбекистоннинг Мустақил давлатлар ҳамдўстлиги, Шанхай ҳамкорлик ташкилоти, Ислом ҳамкорлик ташкилоти ҳамда Европа хавфсизлик ва ҳамкорлик ташкилоти доирасидаги иштироки фаоллашди. Ўзбекистон Ҳамдўстликнинг бир қатор органлари ишига қўшилди, миллий координатор лавозими Бош вазир ўринбосари даражасига кўтарилди. ЕХҲТ Парламент ассамблеяси билан бўлган муносабатлардаги «танаффус» тўхтатилди — Олий Мажлис вакиллари бу тизим фаолиятига қўшилишди. Давлатнинг Иқтисодий ҳамкорлик ташкилоти, Парламентлараро иттифоқ, Марказий Осиё давлатлари ва Озарбайжон билан Араб иқтисодий ҳамкорлик форумидаги иштироки қайта тикланди.
Халқаро молиявий институтлар билан ҳамкорлик муваффақиятли ривожланмоқда, Европа тикланиш ва тараққиёт банки билан алоқа қайта тикланди, Европа инвестицион банки билан ҳамкорлик ўрнатилди.
«Ўзбекистон глобал ва минтақавий миқёсидаги муҳим масалалар бўйича ўзининг қатъий ва фаол позициясига эга эканлигини ҳамда халқаро жараёнларда четдан кузатиб бўлиб туриш ниятида эмаслигини кўрсатди», — деди вазир ўринбосари.
Чет элдаги Ўзбекистон фуқароларига нисбатан муносабат тубдан ўзгарди, уларнинг ҳуқуқ ва манфаатларини ҳимоя қилиш бўйича ишлар сезиларли кучайди.
Ўта қисқа муддат ичида халқаро ҳамжамиятнинг Ўзбекистонга бўлган муносабатини тубдан ўзгартиришга ва мамлакатимизнинг халқаро обрўсини сезиларли даражада мустаҳкамлашга эришилди.
«Ўзбекистон жамиятни демократлаштириш, инсон хуқуқларини ҳимоя қилиш, қонун устуворлигини таъминлаш, иқтисодиётни либераллаштириш ва сўз эркинлигини таъминлашга қаратилган ислоҳотларни амалга оширишга қатъий киришган ишончли ҳамкор сифатида ўз имиджини шакллантирди. Жаҳон ҳамжамияти томонидан давлатимиз ташқи сиёсатининг очиқлиги, конструктивлиги ва шиддатлилиги алоҳида эътироф этилмоқда», — деди у.
«Ўзбекистон тўғрисида ижобий ахборот муҳитини яратиш мамлакатнинг дунёдаги мавқеъини кучайтиради ва инвестицион жозибадорлигини оширади. Таъкидлаш жоизки, Ўзбекистон ишончли тарзда МДҲ, Осиё Тинч океани минтақаси, Яқин Шарқ, Европа ва Америка давлатларининг яқин сиёсий ва иқтисодий ҳамкорларидан бирига айланиб бормоқда», — дея қўшиб қўйди вазир ўринбосари.
Изоҳ (0)