O‘FF “Neftchi” klubi bosh murabbiyi Vadim Abramovni noma’lum muddatda futboldan chetlatdi. Bu haqdagi xabar tashkilot matbuot xizmati tomonidan ma’lum qilindi.

Foto: Getty Images

Aytilishicha, Vadim Abramovga nisbatan e’lon qilingan jazo O‘FF ijroqo‘mi byurosining 2017-yil 16-dekabrdagi 9-sonli qarori asosida qabul qilingan. Boisi, klublar boshliqlari va murabbiylariga belgilangan talablar so‘zsiz ijro etilishi, OAVda O‘FF hamda PFL qarorlari noto‘g‘ri talqin qilinishi mumkin emas. Tashkilot shuning oldini olish uchungina Vadim Abramovni nomuayyan muddatga futboldan chetlashtirgan.

Matbuot xizmati O‘FF intizom kodeksining 5.41 bandini asos sifatida ko‘rsatdi. Bunda O‘FF va PFLdan tashqari, mazkur tashkilotlar rasmiylari sha’niga nisbatan noto‘g‘ri fikrlar bildirilish, O‘FF tomonidan qabul qilingan qarorlar bo‘yicha keng jamoatchilik o‘rtasida nosog‘lom fikrlar vujudga kelishiga sabab bo‘lish kabi holatlar sanab o‘tilgan. Shu tariqa Vadim Abramov intizom kodeksi 2-bo‘limining “d” kichik bandiga asosan millionlar o‘yinidan chetlashtirilgan.

Vadim Karlenovich aynan qaysi joyda va qachon yuqoridagi kabi holatlarga yo‘l qo‘ygani borasida aniq dalillar keltirilmagan. Qayd etish kerak, bungacha O‘FFda Oliy Liga klublari rasmiylari o‘rtasida yig‘ilish o‘tkazilgan bo‘lib, unda rasman Oliy Ligadan tushib ketgan klublar murabbiylari ham ishtirok etgani ma’lum qilingandi.

Abramov boshqaruvida “Neftchi” o‘z tarixida ilk bor Oliy Ligadagi o‘rnini saqlab qola olmagandi. Mavsum avvalida 15-o‘rinni egallagan klubning Birinchi Ligada ikkinchi bo‘lgan jamoaga qarshi o‘tish o‘yinida ishtirok etishi belgilab qo‘yilgan bo‘lsa, O‘FF yangi rahbariyati keyinroq Oliy Ligada 12 ta klub qolishi borasida qaror chiqargan va “Neftchi” o‘tish o‘yinidan chetda qolgandi.

Farg‘onaning “Neftchi” klubi Vadim Abramov boshqaruvida tarixda ilk bor Oliy Ligadan tushib ketdi

Mutaxassis 2010—2012-yillar davomida O‘zbekiston milliy terma jamoasiga ustozlik qilgan bo‘lib, o‘shanda o‘zbekistonlik futbolchilar Osiyo Kubogi tarixida ilk bor yarim finalga qadar yetib borgandi.

Vadim Abramov: Jamoalar 12 ta qolar ekan. Futbolchilar shokda, mashg‘ulotlarni yig‘ishtirib qo‘yaveraylikmi?