ЎФФ «Нефтчи» клуби бош мураббийи Вадим Абрамовни номаълум муддатда футболдан четлатди. Бу ҳақдаги хабар ташкилот матбуот хизмати томонидан маълум қилинди.
Айтилишича, Вадим Абрамовга нисбатан эълон қилинган жазо ЎФФ ижроқўми бюросининг 2017 йил 16 декабрдаги 9-сонли қарори асосида қабул қилинган. Боиси, клублар бошлиқлари ва мураббийларига белгиланган талаблар сўзсиз ижро этилиши, ОАВда ЎФФ ҳамда ПФЛ қарорлари нотўғри талқин қилиниши мумкин эмас. Ташкилот шунинг олдини олиш учунгина Вадим Абрамовни номуайян муддатга футболдан четлаштирган.
Матбуот хизмати ЎФФ интизом кодексининг 5.41 бандини асос сифатида кўрсатди. Бунда ЎФФ ва ПФЛдан ташқари, мазкур ташкилотлар расмийлари шаънига нисбатан нотўғри фикрлар билдирилиш, ЎФФ томонидан қабул қилинган қарорлар бўйича кенг жамоатчилик ўртасида носоғлом фикрлар вужудга келишига сабаб бўлиш каби ҳолатлар санаб ўтилган. Шу тариқа Вадим Абрамов интизом кодекси 2-бўлимининг «д» кичик бандига асосан миллионлар ўйинидан четлаштирилган.
Вадим Карленович айнан қайси жойда ва қачон юқоридаги каби ҳолатларга йўл қўйгани борасида аниқ далиллар келтирилмаган. Қайд этиш керак, бунгача ЎФФда Олий Лига клублари расмийлари ўртасида йиғилиш ўтказилган бўлиб, унда расман Олий Лигадан тушиб кетган клублар мураббийлари ҳам иштирок этгани маълум қилинганди.
Абрамов бошқарувида «Нефтчи» ўз тарихида илк бор Олий Лигадаги ўрнини сақлаб қола олмаганди. Мавсум аввалида 15-ўринни эгаллаган клубнинг Биринчи Лигада иккинчи бўлган жамоага қарши ўтиш ўйинида иштирок этиши белгилаб қўйилган бўлса, ЎФФ янги раҳбарияти кейинроқ Олий Лигада 12 та клуб қолиши борасида қарор чиқарган ва «Нефтчи» ўтиш ўйинидан четда қолганди.
Изоҳ (0)