O‘zbekiston boks federatsiya nima sababdan 2017-yil hisobidan Osiyoda tengsiz deb topildi? Hammasi juda oddiy.
Oldinroq Rio—2016 Olimpiadasini yodga olamiz. O‘zbekiston boks termasi ungacha ham jahonda katta obro‘ga ega bo‘lgan. Biroq Rioda mamlakat boks termasi o‘zining eng yuqori cho‘qqisiga chiqdi va umumjamoa hisobida Kubani-da ortda qoldirib, peshqadamga aylandi.
2017-yilda endi o‘zbekistonliklardan bu mavqeda munosib tura olish talab etilardi. Mamlakat boks federatsiyasini 3 ta yirik musobaqa — WSB, Osiyo Chempionati hamda Jahon Chempionati kutib turgandi. Bunda asosiy e’tibor so‘nggi ikki musobaqaga berildi.
WSB
WSB turnirida Uzbek Tigers jamoasi o‘zining ilk urinishadayoq yarim finalga qadar yetib borib, kubaliklardan yengilgandi. Bu safar tomonlar chorak finaldayoq to‘qnash kelib qoldi va Uzbek Tigers yurishiga yakun yasadi. Kuba Samarqandda taslim qilindi. Safar janglari esa omadsiz kechdi.
Yakunda chempionlikni qo‘lga kiritgan Qozog‘istonning Astana Arlans jamoasi guruh bosqichida Uzbek Tigers bilan janglar o‘tkazgandi. Tomonlar o‘z ringlaridagi to‘qnashuvlarda 4:1 hisobidan zafar quchishgan. Demak, chempionlar bilan oradagi farq katta emasdi.
Osiyo Chempionati
Evaziga O‘zbekiston Toshkent mezbonlik qilgan Osiyo Chempionatida hech kimga imkoniyat qoldirmadi. Shu yilning may oyida qit’aning eng kuchli bokschilari O‘zbekistonga keldi. 10 ta vazn toifasidan 9 ta oltin medalni qo‘lga kiritish tarixda hech kimga nasib qilmagandi. O‘zbekiston boks termasi bu borada rekord o‘rnatdi.
Osiyo Chempionati 1963-yildan buyon o‘tkazib kelinayotgan bo‘lsa, Janubiy Koreya bokschilari 1965 va 1987-yillarda 8 ta oltin medal bilan eng yaxshi bo‘lib turgandi.
Osiyo Chempionatida yarim finalga faqatgina bir o‘zbekistonlik — Sanjar Tursunov yetib kela olmadi. Biroq u ham yakunda Gamburgdagi Jahon Chempionatiga chipta yutib oldi. Ya’ni, 10 imkoniyatdan 10 ta chipta.
Jahon Chempionati
Jahonning eng oldi bokschilari kelgan musobaqada O‘zbekiston yana bir marta Osiyoda eng yaxshisi ekanini isbotlay oldi. Delegatsiya jahonda Kubadan keyin ikkinchi bo‘ldi. Qit’adagi eng asosiy raqib Qozog‘iston esa Rioda bo‘lgani kabi O‘zbekistondan ortda qoldi. Dastlabki to‘qqiztalikka Osiyoning boshqa mamlakatlari yaqinlasha olmadi.
Mana shu natijalari uchun O‘zbekiston boks federatsiyasi Osiyoda tengsiz deb topildi. Ham Osiyo Chempionatida, ham Jahon Chempionatida oltin medalni qo‘lga kiritgan Shahram G‘iyosov esa yil bokschisi sifatida tan olindi.
Professional boks
Boksda O‘zbekistonni butun dunyo biladi. Futbolda Braziliya va Argentina qanchalik hurmat qilinsa, havaskor boksda O‘zbekiston shunday mavqega chiqib ulgurgan. Rio qahramonlaridan hozirgacha to‘rt nafari professional ringlarga o‘tishga qaror qildi — Fazliddin G‘oibnazarov, Rustam To‘laganov, Shahram G‘iyosov va Murod Ahmadaliyev.Xo‘sh, Tokio—2020 Olimpiadasida va kelgusi Jahon Chempionatlarida ularning o‘rnini kim bosishi mumkin? Quyida keltirilgan havolada O‘zbekistonning yangi chempionlari bilan tanishishingiz mumkin.
Izoh (0)