Ўзбекистон бокс федерация нима сабабдан 2017 йил ҳисобидан Осиёда тенгсиз деб топилди? Ҳаммаси жуда оддий.
Олдинроқ Рио—2016 Олимпиадасини ёдга оламиз. Ўзбекистон бокс термаси унгача ҳам жаҳонда катта обрўга эга бўлган. Бироқ Риода мамлакат бокс термаси ўзининг энг юқори чўққисига чиқди ва умумжамоа ҳисобида Кубани-да ортда қолдириб, пешқадамга айланди.
2017 йилда энди ўзбекистонликлардан бу мавқеда муносиб тура олиш талаб этиларди. Мамлакат бокс федерациясини 3 та йирик мусобақа — WSB, Осиё Чемпионати ҳамда Жаҳон Чемпионати кутиб турганди. Бунда асосий эътибор сўнгги икки мусобақага берилди.
WSB
WSB турнирида Uzbek Tigers жамоаси ўзининг илк уринишадаёқ ярим финалга қадар етиб бориб, кубаликлардан енгилганди. Бу сафар томонлар чорак финалдаёқ тўқнаш келиб қолди ва Uzbek Tigers юришига якун ясади. Куба Самарқандда таслим қилинди. Сафар жанглари эса омадсиз кечди.
Якунда чемпионликни қўлга киритган Қозоғистоннинг Astana Arlans жамоаси гуруҳ босқичида Uzbek Tigers билан жанглар ўтказганди. Томонлар ўз рингларидаги тўқнашувларда 4:1 ҳисобидан зафар қучишган. Демак, чемпионлар билан орадаги фарқ катта эмасди.
Осиё Чемпионати
Эвазига Ўзбекистон Тошкент мезбонлик қилган Осиё Чемпионатида ҳеч кимга имконият қолдирмади. Шу йилнинг май ойида қитъанинг энг кучли боксчилари Ўзбекистонга келди. 10 та вазн тоифасидан 9 та олтин медални қўлга киритиш тарихда ҳеч кимга насиб қилмаганди. Ўзбекистон бокс термаси бу борада рекорд ўрнатди.
Осиё Чемпионати 1963 йилдан буён ўтказиб келинаётган бўлса, Жанубий Корея боксчилари 1965 ва 1987 йилларда 8 та олтин медаль билан энг яхши бўлиб турганди.
Осиё Чемпионатида ярим финалга фақатгина бир ўзбекистонлик — Санжар Турсунов етиб кела олмади. Бироқ у ҳам якунда Гамбургдаги Жаҳон Чемпионатига чипта ютиб олди. Яъни, 10 имкониятдан 10 та чипта.
Жаҳон Чемпионати
Жаҳоннинг энг олди боксчилари келган мусобақада Ўзбекистон яна бир марта Осиёда энг яхшиси эканини исботлай олди. Делегация жаҳонда Кубадан кейин иккинчи бўлди. Қитъадаги энг асосий рақиб Қозоғистон эса Риода бўлгани каби Ўзбекистондан ортда қолди. Дастлабки тўққизталикка Осиёнинг бошқа мамлакатлари яқинлаша олмади.
Мана шу натижалари учун Ўзбекистон бокс федерацияси Осиёда тенгсиз деб топилди. Ҳам Осиё Чемпионатида, ҳам Жаҳон Чемпионатида олтин медални қўлга киритган Шаҳрам Ғиёсов эса йил боксчиси сифатида тан олинди.
Профессионал бокс
Боксда Ўзбекистонни бутун дунё билади. Футболда Бразилия ва Аргентина қанчалик ҳурмат қилинса, ҳаваскор боксда Ўзбекистон шундай мавқега чиқиб улгурган. Рио қаҳрамонларидан ҳозиргача тўрт нафари профессионал рингларга ўтишга қарор қилди — Фазлиддин Ғоибназаров, Рустам Тўлаганов, Шаҳрам Ғиёсов ва Мурод Аҳмадалиев.Хўш, Токио—2020 Олимпиадасида ва келгуси Жаҳон Чемпионатларида уларнинг ўрнини ким босиши мумкин? Қуйида келтирилган ҳаволада Ўзбекистоннинг янги чемпионлари билан танишишингиз мумкин.
Изоҳ (0)