Toshkent moliya-iqtisod kasb-hunar kollejida Jinoyat ishlari bo‘yicha Sergeli tumani sudi tomonidan O‘zbekiston Milliy universiteti to‘rtinchi kurs talabasi Sarvar Soliyevga nisbatan qo‘zg‘atilgan jinoyat ishini ko‘rib chiqish bo‘yicha sayyor sud majlisi bo‘lib o‘tdi, deb xabar beradi O‘zA.
Joriy yil avgust oyining oxirlarida Sarvar Soliyev yaqin do‘sti Feruzning uyida ota-onasi yo‘qligidan foydalanib, uning onasi Nasiba Burhonovaga tegishli 28 million 200 ming so‘mlik tilla taqinchoqlarni o‘g‘irlagan. Keyingi kun esa ushbu tilla taqinchoqlarni boshqa shaxslarga 4 million 600 ming so‘mga sotib, pullarni o‘zining ehtiyojlariga sarflab yuborgan.
Jabrlanuvchi N.Burhonova tilla taqinchoqlari yo‘qolganini sezgach, oila a’zolaridan bu haqda so‘raydi. Yo‘qolgan taqinchoqlarni topishning imkoni bo‘lmagach, u ushbu holat bo‘yicha ichki ishlar idoralariga xabar beradi. Ichki ishlar idoralari xodimlari tomonidan o‘tkazilgan tadbirlar natijasida mazkur jinoyatni o‘g‘lining do‘sti Sarvar Soliyev sodir etgani aniqlandi.
Sayyor sud jarayonida ayblanuvchi qilgan jinoyatiga iqror bo‘ldi. Qilmishidan pushaymonligini bildirib, suddan unga nisbatan yengillik berishni so‘radi.
O‘zbekiston Respublikasi Jinoyat kodeksining 169-moddasi(o‘g‘rilik) tegishli bandi bilan Sarvar Soliyevga 3 yil ozodlikni cheklash jazosi tayinlandi.
Ozodlikni cheklash jazosini Toshkent shahar, Sergeli tumani, Sergeli-4 mavzesi, 16-uy, 45-xonadonda soat 22:00 dan 06:00 ga qadar o‘tash belgilandi. S.Soliyev zimmasiga jazoni o‘tash davrida yetkazilgan moddiy zararni qoplash majburiyati yuklatildi.
Izoh (0)