Тошкент молия-иқтисод касб-ҳунар коллежида Жиноят ишлари бўйича Сергели тумани суди томонидан Ўзбекистон Миллий университети тўртинчи курс талабаси Сарвар Солиевга нисбатан қўзғатилган жиноят ишини кўриб чиқиш бўйича сайёр суд мажлиси бўлиб ўтди, деб хабар беради ЎзА.
Жорий йил август ойининг охирларида Сарвар Солиев яқин дўсти Ферузнинг уйида ота-онаси йўқлигидан фойдаланиб, унинг онаси Насиба Бурҳоновага тегишли 28 миллион 200 минг сўмлик тилла тақинчоқларни ўғирлаган. Кейинги кун эса ушбу тилла тақинчоқларни бошқа шахсларга 4 миллион 600 минг сўмга сотиб, пулларни ўзининг эҳтиёжларига сарфлаб юборган.
Жабрланувчи Н.Бурҳонова тилла тақинчоқлари йўқолганини сезгач, оила аъзоларидан бу ҳақда сўрайди. Йўқолган тақинчоқларни топишнинг имкони бўлмагач, у ушбу ҳолат бўйича ички ишлар идораларига хабар беради. Ички ишлар идоралари ходимлари томонидан ўтказилган тадбирлар натижасида мазкур жиноятни ўғлининг дўсти Сарвар Солиев содир этгани аниқланди.
Сайёр суд жараёнида айбланувчи қилган жиноятига иқрор бўлди. Қилмишидан пушаймонлигини билдириб, суддан унга нисбатан енгиллик беришни сўради.
Ўзбекистон Республикаси Жиноят кодексининг 169-моддаси(ўғрилик) тегишли банди билан Сарвар Солиевга 3 йил озодликни чеклаш жазоси тайинланди.
Озодликни чеклаш жазосини Тошкент шаҳар, Сергели тумани, Сергели-4 мавзеси, 16-уй, 45-хонадонда соат 22:00 дан 06:00 га қадар ўташ белгиланди. С.Солиев зиммасига жазони ўташ даврида етказилган моддий зарарни қоплаш мажбурияти юклатилди.
Изоҳ (0)