AQSh Milliy arxivi Federal qidiruv byurosining 35-prezident Jon Kennedining o‘limiga oid 10 mingdan ortiq hujjatlarni e’lon qildi, deb xabar berdi “Korrespondent.net”.
E’lon qilingan beshinchi to‘plamdan 10,7 ming hujjat o‘rin olgan bo‘lib, ular orasidagi 144 tasi birinchi bor taqdim etildi. 8,3 ming hujjat tuzatishlarsiz e’lon qilindi.
Hujjatlardan birida qayd etilishicha, FQB Buyuk Britaniyadagi manbalari orqali Kennedining qotili Li Xarvi Osvald ushbu mamlakatda yashagan yoki yo‘qligini aniqlashga harakat qilgan. FQB direktorining ismi keltirilgan boshqa bir hisobotda esa Meksika kommunistik partiyasi Osvald ishiga qiziqish bildirgani yozilgan.
Eslatib o‘tamiz, Donald Tramp oktabr oxirida AQShning sobiq prezidenti Jon Kennedi o‘ldirilishi bilan bog‘liq barcha hujjatlarni e’lon qilishga va’da bergan edi.
Izoh (0)