Rossiya saytlaridan birida yaqinda “Yashash bo‘yicha mutaxassis” vakansiyasi paydo bo‘ldi. Qandaydir qurilish bilan shug‘ullanuvchi tashkilot hayratlanarli ishni taklif qildi: bir necha oy davomida endigina qurilib, yangi ta’mirlangan va jihozlangan uyda yashash, o‘z taassurotlarini kameraga yozish va buning uchun kamida 1400 AQSh dollari olish.
Kompaniya (nomini aytmaymiz) vakansiyaga berilgan izohda aytishicha, shu yo‘l bilan mijoz ehtiyoji haqida ko‘plab ma’lumotlarni olishga erishgan. Bu taklif faqat bitta savolni keltirib chiqaradi: agar turar-joy majmuasida hamma narsa ajoyib bo‘lsa, nima uchun u yerda na kompaniya asoschisi va na xodimlari yashaydi?
Nima uchun aynan shu savol xayolga keladi? Chunki ko‘pincha shunday holatga duch kelamizki, u yoki bu mahsulotlar yaratuvchilari o‘z “ijod mahsul”larini maqtaydi, ammo o‘zlari undan foydalanishga shoshilmaydi. Bu plastik stakanlardan tortib, turar-joylargacha bo‘lgan hamma narsaga tegishli. Agar u yoki bu brend ustida ishlaydiganlarning o‘zi unga ishonmasa, unga biz qanday ishona olamiz?
Bizning mamlakatimizda, afsuski, bu boradagi vaziyatni yaxshiroq deb bo‘lmaydi. Jurnalistik so‘rov (anonim, albatta) chog‘ida so‘ralganlarning faqat beshdan bir qismigina o‘zlari yaratadigan narsani sinovdan o‘tkazishi va qo‘llashini aytdi. Bunday odamlardan biri Murad Buildings asoschisi Murod Nazarov bo‘lib chiqdi.
Ma’lum bo‘lishicha, 2010-yildan buyon u Millenium turar-joy majmuasida istiqomat qiladi. U kompaniyaning birinchi loyihasi bo‘lib, Yunusobod tumanida joylashgan bir massivli uydir. Biz yuqorida Murad Buildings asoschisini bir nechta savollarga javob berishga ko‘ndirdik.
J: Murod, nima uchun siz yashash uchun hovli-joy emas, aynan ko‘p qavatli uydagi xonadonni tanladingiz?
MN: Murad Buildings hovlilarni qurishni boshlasa, balki o‘shanda men ham ko‘chib o‘tarman. Lekin, hozir qurgan uylarimiz bizning barcha ehtiyojimizni qondiradi. O‘zimiz u yerda yashashni istamayotgan bo‘lsak, biz qanaqa uy qurayotgan bo‘lamiz?
J: Mish-mishlarga ko‘ra, xodimlaringizga turar-joylardan xonadon olishda chegirmalar berilar ekan. Bu rostmi?
MN: Bu haqiqatan ham shunday. Turar-joy majmualarimizning har birida — Ko‘kcha Qo‘rg‘oni, Gulsaroy, Amir Temur — bizning xodimlarimiz yashaydi. Ular uchun maxsus chegirmalar bor. Ular orqali uy-joy sotib olish manfaatli va biz doimo xodimlarni aynan bizning majmualarimizdan xonadon tanlashga undaymiz. Axir aks holda, uy-joyning barcha afzalliklari va kamchiliklari haqida tasavvurga ega bo‘lish qiyin. Biz o‘zimiz yaratayotgan narsani yaxshi his qilishimiz va tushunishimiz kerak.
Agar biz o‘zimiz qurgan uylarda yashamasak, ularni kimgadir taklif qila olmaymiz — bu xuddi o‘zimiz tatib ko‘rmagan osh bilan birovni mehmon qilishdek gap.
J: Ko‘p xonadonli binolarning hovli-joydan afzal jihati nimada?
MN: Ko‘p xonadonli imoratlar markaziy tumanlarda joylashgan, hovli-joylarni esa markazda qurish deyarli ilojsiz. Hatto qurilgan taqdirda ham, ular buzilishga tushishi ehtimoli katta.
Ikkinchidan, ko‘p qavatli binolar atrofida, odatda, infratuzilma ko‘proq rivojlangan bo‘ladi — sport maydonlari, do‘konlar, savdo markazlari bo‘ladi.
Shuningdek, ko‘p qavatli uylardagi xonadonlar likvidliroq bo‘ladi (naqd pulga aylantirish oson). Ular vaqt o‘tishi bilan o‘z qimmatini yo‘qotmaydi, xususiy uy-joy narxi esa vaqt o‘tishi bilan to‘xtovsiz pasayib boradi.
Bundan tashqari, xonadonlar hududni ko‘rkamlashtirish uchun vaqti yoki xohishi bo‘lmaganlar uchun qulayroqdir — turar-joy majmuasida bu bilan mas’ul xodimlar shug‘ullanadi.
J: Vaqt o‘tishi bilan yangi qurilgan majmualardan qaysi biriga ko‘chib o‘tgan bo‘lardingiz?
MN: Obyektlarimizning har birida qurilish yakuniy bosqichga yetganida “Bu yerga ko‘chib o‘tish qanday ajoyib bo‘lardi-ya!”, degan fikr tug‘iladi. Hozir onamning sharafiga “Mufarrah” deb nom berilgan majmua qurilishi yakunlanmoqda va u yerda onam uchun bitta xonadon ajratilgan. U yerda o‘zim ham jon deb yashagan bo‘lardim. Qurilayotgan “Do‘stlar” majmuasi bo‘ylab sayr qilar ekansiz, uning go‘zalligidan shunchalar ilhom olasizki, u yerga ham ko‘chib borish istagi paydo bo‘ladi.
Bu katta baxt, kompaniyamiz muvaffaqiyatining bosh siri esa quyidagicha: quruvchining o‘zi loyihaga maftun bo‘lsa, bunday uyga boshqalar ham ko‘chib o‘tishni istaydi.
J: Murad Buildings uylari sizda qanday tasavvur va his-tuyg‘ularni uyg‘otadi?
MN: Qandaydir yaqinlik, iliqlik tasavvurini uyg‘otadi. Shunga o‘xshash tasavvurlarni uyda tayyorlangan pishiriqlar ham uyg‘otadi — qandaydir nostandartlik va juda shinamlik.
J: O‘zingizni xonadon sohiblari o‘rniga qo‘yib ko‘rish uchun majmualarning har birida yashab ko‘rishni istagan bo‘larmidingiz?
MN: Har bitta uyda yashab ko‘rish imkoniyati, afsuski, menda mavjud emas, ammo ba’zan u yerda yashayotgan do‘stlarimnikiga mehmonga boraman, va har safar hamma narsani istiqomat qiluvchining nuqtai nazaridan baholayman: nimani qo‘shish, nimani yaxshilash mumkin, nimadan esa voz kechgan ma’qul?
Xulosa
Quruvchi, ishlab chiqaruvchi, hatto oddiy tikuvchining buyurtmachi oldidagi mas’uliyati — tovar yoki xizmatlarni tanlash vaqtida e’tibor qaratish kerak bo‘lgan eng muhim narsalardan biri. Vijdonan qilingan, ushbu ne’matlarni ishlab chiqarayotgan odamlarning o‘zlari afzal ko‘radigan narsalarni tanlang — shunda pand yemaysiz.
Reklama huquqi asosida
Izoh (0)