Ispaniya milliy terma jamoasi safida jahon va Yevropa chempionligini qo‘lga kiritgan, “Barselona” bilan yutish mumkin bo‘lgan barcha sovrinlarga ega chiqqan afsonaviy himoyachilardan biri Karles Puyol 9-noyabr kuni Toshkentga tashrif buyuradi. Bu haqda O‘FF matbuot xizmati xabar berdi.
Puyolning tashrifi O‘FF va FIFA prezidentlari o‘rtasidagi uchrashuv va hamkorlik samarasi ekani aytilgan. Avvalroq Xalqaro Futbol Uyushmasi prezidenti Janni Infantino O‘zbekiston futbolidagi o‘zgarishlarga xayrixoh ekanligini bildirib, jahon futboli yulduzlarining mamlakatga tashrifiga ko‘maklishni va’da bergandi.
Puyol Toshkentga tashrifi davomida futbol akademiyalariga boradi va yosh futbolchilarga master-klass o‘tab beradi. Bunda uning aynan qaysi akademiyalarda bo‘lishi va O‘zbekistonga safari necha kunga mo‘ljallangani aytilmagan.
Aniq tomoni, Karles Puyol Oliy Liga 28-turidan o‘rin olgan “Paxtakor” va “Olmaliq” klublari o‘rtasidagi bellashuvni stadionning o‘zidan tomosha qiladi. Qayd etish kerak, O‘FF prezidenti xalqaro safarlarga “Paxtakor” prezidenti Bobur Shodiyev bilan boradi. Infantino bilan uchrashuv ham bundan mustasno bo‘lmagandi.
Karles Puyol 2008-yil “Bunyodkor” rahbariyati taklifiga ko‘ra ham Toshkentga kelgandi. Bunda himoyachiga Andres Inyesta va Sesk Fabregas hamrohlik qilgan. “Bunyodkor” sabab Toshkentda, shuningdek, Samuel Eto’O, Krishtianu Ronaldu, Lionel Messi kabi mashhurlar ham aynan 2008-yil mehmon bo‘lgandi.
Izoh (0)